Мемлекет басшысы Қасым-Жомарт Тоқаев атап өткен «Адал азамат тұжырымдамасының бір тарауы сол еңбек адамынан басталады. Адал азамат дегеніміздің өзі – жақсы қасиеттерге ие болып, адал еңбек ететін және табысқа адал жолмен жететін адам. Яғни, адалдық пен әділдікті бәрінен биік қоятын жан.
«Озық ойлы ұлт болу үшін бүкіл қоғам сана-сезімін өзгертіп, жаңа құндылықтарды орнықтыруы керек. Әрбір адам «Адал азамат» деген атқа лайық болса, елімізде әділ қоғам орнайды. «Адал адам – Адал еңбек – Адал табыс» – бір-бірінен ажырамайтын ұғымдар. Осы үш тағанды озық әрі табысты елге айналудың басты кілті деуге болады», – деп атап өткен болатын Мемлекет басшысы өз сөзінде.
Қызметте абырой биігінде жүріп, аянбай еңбек ету адам баласын алысқа апарады. Біздің кейіпкеріміздің өмір жолы-осының дәлелі. Қайсарлық пен өр мінез-адам бойындағы асыл қасиеттердің ең биігі десек, «Қаратау» тау-кен өңдеу кешені еңбеккерлерінің қайсысын алсақ та, жаратылысы бөлек, білектің күшімен кен өндірген қайсар жандар.
Бүгінгі әңгімемізге арқау болып отырған, қызметте абырой биігінде жүріп, аянбай еңбек еткен, «БелАЗ» жүк көлігін қырық жылға жуық уақыт тізгіндеп келе жатқан жүргізуші Кеңес Тұрарұлы Қонысов.
Әдетте көлік жүргізу-қазір де, бұдан бұрында мамандықтың төресі екендігі жиі жазылады. Көлік жүргізушілердің істеріне қадір-құрметтің ортаймауы да содан болар.
Кейіпкеріміз Түркістан облысы, Абай совхозында 1965 жылы дүниеге келген. Отбасы жағдайына байланысты Бәйдібек ауданы, Алғабас ауылына қоныс аударғандықтан, сол жердегі Ғани Мұратбаев атындағы орта мектептің табалдырығын 1972 жылы аттап, сол білім ордасын бітіріп, куәлігін қолына алады. Бала кезінен техникаға қызығушылығы бас-ым болған Кеңес Тұрарұлы Түркістан облысы, Жамбыл совхозындағы көлік жүргізушілер курсында оқиды.1983 жылы Ресейдің Красноярскі қаласында әскери борышын атқарып, 1985 жылы елге оралады.
Өзге өңірден өндірісті өлкеге атбасын тіреген азамат Жаңатас қаласындағы кеніш туралы ести сала жұмысқа келеді.1986 жылы «Көкжон» кенішіне жұмысқа орналасып, автослесарь болып қызмет атқарады. Жұмыс орнының жолдамасымен, сол жерде жүріп «БелАЗ» жүргізушісі курсын қосымша оқиды. 1990 жылы «БелАЗ» жүргізушісі болса, 1992 жылы үлкен «БелАЗ»-ды тізгіндейді.
-Ең алғаш әлі есімде 40 тонналық, одан кейін 110 тонналық, қазіргі таңда 136 тонналық «БелАЗ»-ды тізгіндеп жүрмін. Комбинатқа келгенім кеше ғана сияқты еді. Уақыт зымырауда. Соңымыздан жас жүргізушілер ілесіп келеді. Оларға тәлімгерлік етіп, жауапкершілігі мол кәсіптің қыр-сырын үйретіп келеміз. Жұмысқа адал ниеті бар жұмысшыларды көргенде қуанамын. Ұжымда ауызбіршілік мол, кез келген жұмысты бір кісідей атқарып, бір-біріне қолдау көрсетіп тұрады. Осындай ұжыммен жұмыс істегеніме қуаныштымын. Жұмысым өзіме ұнайды,-дейді байсалды жүргізуші.
Бүгінде аудандық орталықтандырылған кітапханада кітапханашы қызметін атқарып жүрген Салима Қосайқызы Тоқпанбетовамен 4 ұл-қыз тәрбиелеп, 6 немере сүйіп отырған жайы бар. Перзенттері де өздері қалаған мамандықтың иелері. Үлкен ұлы мен қызы ішкі істер бөлімінде қызмет атқарса, одан кейінгі баласы жоғары оқу орнында студент. Ал шаңырақтың кенжесі Алматы қаласындағы Абай атындағы дарынды балалар мектебінде білім алуда. Әрқайсысының өз жолын тауып кетуіне себепкер болып отырған отағасының ұжымында да абыройы асқақ. Адал еңбек, маңдай терін бағалаған «Қаратау» тау-кен өңдеу кешенінің басшылығы кейіпкеріміздің суретін ғимараттың алдында орналасқан «Құрмет тақтасына» ілген. Сонымен қатар, бірнеше марапаттарға ұсынылған. Атап айтар болсақ, кешен басшылығының Құрмет грамотасы, Алғыс хаты және аудан әкімінің де Құрмет грамотасымен марапатталған.
Алпыстың асқарына шықса да, айбыны таймаған Кеңес аға осылайша қызметінің жемісін көріп келеді. Міне, біз білетін бір еңбек адамының қысқаша өмір жолы осындай.
Мемлекет басшысы «Біз құрып жатқан жаңа қоғамда еңбек адамы ең бірінші орында тұруы керек» деген ұстанымын қолдау мақсатында біз де жұмысшылардың тыныс-тіршілігіне үңілдік. Қарапайым азаматтар күнделікті өмірде көрсетіп жатқан іскерлік, еңбекқорлық қасиеттер шын мәнінде біздің отаншылдық рухымызды көтереді деген сенімдеміз.
