Мәжіліс спикері, «AMANAT» партиясының Төрағасы Ерлан Қошанов еліміздің үш аймағында «Кітап оқитын ұлт» зияткерлік-ағартушылық жобасы басталғанын мәлімдеді. Аталған жоба Мемлекет басшысы Қасым-Жомарт Тоқаевтың Атырауда өткен Ұлттық құрылтайдың III отырысында айтылған тұжырымдамасы аясында жүзеге асырылуда.
«Қасым-Жомарт Кемелұлы Тоқаев президенттікке кіріскен алғашқы күндерден бастап зияткер ұлт қалыптастыру бойынша ауқымды реформаларды жүйелі түрде жүзеге асырып келеді. Мемлекет басшысы білім – жаһандану жағдайында еліміздің табысқа жетуінің басты факторы екенін түрлі алаңдарда үнемі айтуда.
Аталған міндеттемелерді іс жүзінде жүзеге асырудың маңызды қадамдарының бірі – кітап оқу. Сондықтан да Президентіміз Атыраудағы Ұлттық құрылтайдың ІІІ отырысында бұл мәселеге ерекше тоқталды. Ол өз сөзінде: «…озық ойлы ұлт болудың ең төте жолы – кітап оқу. Сондықтан кітап оқу мәдениетін қоғамда барынша орнықтыруымыз керек» деп атап өтті», – дейді Ерлан Қошанов.
Мәжіліс спикері кітап оқу мәдениетін ілгерілету мақсатында партия аясында атқарылып жатқан бірқатар шаруаларға кеңінен тоқталып өтті.
«Мемлекет басшысының саясатын қолдау мақсатымен «AMANAT» партиясы «Кітап-AMANAT» жобасын іске қосты. Жоба аясында отандық баспагерлер мен жазушыларды қолдау, олардың туындыларын ілгерілету мен насихаттау бағытында ауқымды жұмыс жүргізілуде. Қазіргі таңда еліміз бойынша жергілікті партия филиалдарында 24 кітап орталығы жұмыс істеп тұр.
Партия бастамасымен жаңадан қабылданған «Салық кодексінде» отандық баспагерлер үшін қосымша құн салығы алынып тасталды.
Сонымен қатар кітапхана қызметкерлерінің жалақысын көтеру және еліміздің барлық аймағындағы кітапханаларды қайта жаңғырту жұмысы жүргізіліп келеді.
Отандық жазушылар мен ақындарды қолдауға бағытталған дәстүрлі «Ұлы дала» шығармашылық байқауы әдебиет әлемінде жаңа есімдер мен шығармалардың пайда болуына ықпал етуде.
Бұл бағыттағы жұмыс жалғасын табады.
Сонымен бірге партия биылғы жылы оқу мәдениетін қалыптастыру бағытындағы іс-шаралар ауқымын кеңейту үшін «Кітап оқитын ұлт» жаңа жобасын бастап жатыр.
Оның мақсаты – Қазақстанды әлемдегі ең көп кітап оқитын он мемлекеттің қатарына енгізу.
Жоба алғашқы кезеңде Қарағанды, Қостанай облыстарында және Шымкент қаласында пилоттық режимде іске қосылады», – дейді Мәжіліс спикері.
Мәжіліс спикерінің айтуынша, бұл жоба биыл үш аймақта өткізілсе, келесі жылы барлық аймақты қамтымақ.
«Партия байқауының жеңімпаздары әр аталым бойынша қомақты қаржылай сыйлыққа ие болады.
Пилоттық жоба аясында үш аймақта 100 мыңнан аса адамды қамту жоспарланып отыр. Келер жылы жоба еліміздің барлық аймағында жүзеге асырылады.
Қадірлі достар!
Әр кітап – жәй ғана тарих емес, ол жаңа білім, бастамалар мен тың ойларға жасалған қадам.
Біз «Кітап оқитын ұлт» байқауы арқылы қазақстандықтарды күн сайын кітап оқып, шабыттанып өсуіне, алға жылжуына жол ашқымыз келеді.
Кітап оқу – біздің қоғамымызды бәсекеге қабілетті әрі мықты етуге, ал мемлекетімізді – дамыту жолындағы алтын кілтіміз. Байқаудың барлық қатысушыларына сәттілік тілеймін!», – дейді Ерлан Қошанов.
Еске сала кетейік, «Кітап оқитын ұлт» жобасы алты бағыт бойынша өткізіледі. Мектеп оқушылары, колледж және жоғары оқу орындарының студенттері, педагогтер, отбасылық әулеттер мен мемлекеттік қызметшілер «Кітап оқитын мектеп», «Кітап оқитын колледж», «Кітап оқитын университет», «Кітап оқитын педагог», «Кітап оқитын әулет» және «Кітап оқитын мемлекеттік қызметкер» аталымдары бойынша жарысады. Әр бағыт бойынша сарапшылар мен сала мамандары ұсынған 15 кітапты қамтитын арнайы тізім әзірленді. Мысалы, 6–10 сынып оқушылары үшін әр сыныпқа бөлек 15 кітаптан, жалпы 75 кітап ұсынылды.
Айта кетерлігі, бұл тізімге «100 кітап» жалпыұлттық сауалнамасында іріктелген 100 шығарманың 43-і енді.
turkystan.kz
