Тараз қаласының әкімі Бақытжан Орынбеков шаһардағы бірқатар нысанды аралады. Әуелі шаһар басшысы «Ақжол», «Қайнар», «Мичуринец», «Родничок» тұрғын алқаптарын орталықтандырылған ауызсумен қамтамасыз ету жұмыстарын көрді.
Қазіргі таңда «Ақжол» және «Қайнар» алқаптарындағы жұмыстар толығымен аяқталса, өзге аумақтарда құрылыс қарқынды жүруде. Бұл жобаның аясында аталған алқаптардағы 45 көше, 5 бұрылыс және 1 050 аулаға ауызсу жүйесі тартылып, 5 400-ден астам тұрғын сапалы тіршілік нәрін тұтынады.
Осы ретте шаһар аумағында 2023-2025 жылдары «Қуатты өңірлер – ел дамуының драйвері» ұлттық жобасы арқылы республикалық, облыстық бюджеттің қолдауымен 641,7 шақырым су құбыры жүргізілгенін айта кетейік. Нәтижесінде «Шөлдала», «Құмшағал», «Көлтоған», «Қызылабад», «Жиделі», «Қарасай», «Тектұрмас», «Родничок», «Ақжол», «Қайнар», «Мичуренец», «Шалғай Қарасу-1, 2, 3, 4, 5, 6, 7» тұрғын алқаптарындағы 11 258 аула мен 56 мыңнан астам тұрғын сапалы тіршілік нәріне қол жеткізіп отыр.
Бұдан кейін қала әкімі Белсенді ұзақ өмір орталығының құрылысымен танысты. Аяқталмаған тұрғын үйді орталық ретінде қайта жабдықтау жұмыстары ағымдағы жылдың сәуір айының аяғында басталған. Құрылыс жыл соңына дейін аяқталады деп жоспарланып отыр. Орталықта бассейн, спортпен айналысуға арналған түрлі сауықтыру залдары және мүмкіндігі шектеулі жандарға арнайы жеделсатылар қарастырылған.
Келесі кезекте шаһар басшысы Байзақ батыр көшесінің бойында салынып жатқан сквердің құрылысын көрді. «MART» сауда орталығының жанындағы скверде тынығуға арналған орындықтар, көлік тұрағы, демалыс аймағы орналасады. Сонымен қатар бозарша және қайың ағаштары егіліп, нысан толығымен көгалдандырылады.
Бақытжан Әмірбекұлы құрылыс жұмыстары жүріп жатқан білім ордаларына да арнайы барды. Ең әуелі шаһар басшысы №13 орта мектептің күрделі жөндеу жұмыстарының сапасын тексерді. Бүгінде білім ошағының шатырларын, терезелерін ауыстыру, сыртқы инженерлік, ішкі электр, жылу жүйелерін жаңалау, сырлау, абаттандыру, қасбетін жаңғырту жұмыстары толығымен аяқталып, ішінара кемшіліктері ретке келтірілуде. Барлық кабинеттерде сынып жиһаздары орнатылып, тазалық жұмыстары аяқталды.
Әрі қарай қала әкімі №15 мектеп-гимназиясына жапсарлас салынып жатқан 300 орындық ғимараттың құрылысымен танысты. Қазіргі таңда бұл оқу ордасында құрылыс-монтаждау жұмыстары 93 пайызға орындалған. Атап айтсақ, ішкі әрлеу, безендіру, ішкі-сыртқы инженерлік жүйелерін жаңғырту, су, жылу, қасбеті, абаттандыру, сыртқы қоршау жұмыстары толығымен тәмамдалған.
Сондай-ақ Бақытжан Әмірбекұлы Абай даңғылында салынып жатқан көпірге де ат басын бұрды. Бүгінде мұндағы жұмыстар қарқынды жүргізілуде. Құрылысы биыл басталған нысанды 2026 жылы аяқтау жоспарланып отыр. Жобаның аяқталу мерзімі 15 айды құрайды. Қазіргі таңда Абай даңғылының теміржолдан арғы бөлігінде асфальт жабындысы алынып, көпірдің тірек қабырғалары орнатылып, тиісті инженерлік жұмыстар жүзеге асырылуда.
Әр құрылыс нысанымен жіті танысқан қала әкімі бірқатар сын-ескертпелер айтып, жауапты тұлғалар мен мердігерлерге нақты тапсырмалар жүктеді.
