Белгілі сыншы, әдебиеттанушы Амангелді Кеңшілік соңғы бір аптада қазақ қоғамында дау болып жатқан ақын Танакөз Толқынқызының жазбасына қатысты пікір білдірді. Қазақтың жанына тиетін ауыр сөздермен сынап, елдегі жағдайды ашық айтқан ақын қызға жабылып жатқан жағымпаздар көбейіп кетті. Мін мен сынға қарай алмайтын адамдар ақынды жазалау керектігін айтып тулауда. Алайда сыншы, журналист ақын қызды жақтап шықты.
«Асыл аналарымызды, ардақты аруларымызды мерекесімен құттықтайын деп әлеуметтік желіні қарап қалсам, біраз жігіттер ақын Танакөз Толқынқызына “керемет сый” жасап, ауыр-ауыр сөздер айтып тастапты. Ақын қарындасымның пікірі біраз жігіттің намысына қамшыдай тиген екен. Шетінен намысшыл “тұлғалардың” әйелдер мерекесін ескеріп, ең болмағанда 9 наурызға дейін шыдауға да шамалары жетпепті», — деп жазды сыншы.
Әйткенмен, ол жалған намысшылдарға таң қалатынын айтты.
«Неге солардың Жаңаөзен оқиғасы кезінде, Қаңтар қырғынында жастардың қаны судай төгілгенде намыстары оянбады? Егер ұмытып кетсеңіздер, естеріңізге салайын. Сол кездері шалбар кигені үшін ғана өздерін жігіт санап жүргендердің биліктен қорқып айта алмаған шындығын Танакөз Толқынқызы айтқан болатын. Енді солардың ақын қарындасымды сотқа бергісі келіп жатқан әрекеттерінен шошып, жағамды ұстадым. Егер Танакөз халықтың жауы болса, мен де халықтың жауымын. Қолдарыңнан келсе, мені де сотқа беріңдер. Өйткені, жиырма жыл бұрын “Қазақты сүю” атты мақаламда мен де Танакөз айтқан шындықтарды жазғанмын», — деп күйінді Амангелді Кеңшілік.
todayinfo.kz
