4 наурыздан бастап Қазақстандағы көптеген букмекерлік кеңселерде ақша шығару мен шот толтыру уақытша тоқтатылды. Ақпаратқа сәйкес, елдегі банктердің көбі букмекерлік компанияларға төлем жасау және қаражат шешу операцияларын шектеген. Қазір кейбір платформаларда шотты тек Kaspi арқылы толтыру мүмкіндігі ғана сақталған.
Мәселе Қазақстан заңнамасындағы өзгерістерге байланысты. Енді барлық заңды букмекерлер Ставкаларды есепке алудың бірыңғай жүйесіне (ЕСУ) қосылып, барлық төлемдерді Nomapay бірыңғай жүйесі арқылы жүргізуі тиіс. Көптеген компаниялар бұл жүйеге толық қосылып үлгермегендіктен, төлемдер уақытша тоқтаған.
Мысалы, Olimpbet компаниясы да бұл жағдайды растады. Олардың айтуынша, Ұлттық банктің арнайы шешіміне дейін төлемдер уақытша тоқтатылған, ал алдын ала ескерту болмаған.
Қазақстанда ресми түрде 10 букмекерлік компания жұмыс істейді. Қазір олардың бір бөлігінде техникалық жұмыстар жүріп жатыр.
Букмекерлік компаниялар клиенттерге шоттағы қаражат қауіпсіз екенін және жүйе реттелгеннен кейін төлемдер қайта іске қосылатынын хабарлады.
