Жамбыл облысында «Таза Қазақстан» жалпыұлттық экологиялық бастамасы аясында World Cleanup Day – Дүниежүзілік тазалық күніне орай сенбілік ұйымдастырылды.
Облыс әкімі Ербол Қарашөкеев жастармен, мемлекеттік органдардың, қоғамдық ұйымдар мен кәсіпорындардың өкілдерімен бірге Тараз қаласындағы «Мамыр» саябағында тазалық жұмыстарына қатысты.
Сенбілік барысында саябақ аумағы тазартылып, абаттандыру жұмыстары жүргізілді.
Бұдан бөлек, тазалық жұмыстары «Бәйтерек» шағынауданында және «Қарасу» каналының аумағында ұйымдастырылды. Нәтижесінде жалпы ұзындығы 15 шақырым арық жүйелері мен каналдар тазартылып, 350 тонна күл-қоқыс шығарылды.
Өңір басшысы тазалық жұмыстарына белсенді қатысып, қоршаған ортаны қорғауға және туған өлкенің көркеюіне үлес қосып жүрген азаматтарға алғысын білдірді.
– Тазалық – баршамызға ортақ жауапкершілік. Қоршаған ортаны таза ұстау әр адамның күнделікті әдетіне айналуы қажет. Осындай игі бастамалар арқылы экологиялық мәдениетті қалыптастырып, туған жеріміздің тазалығына бірге үлес қосамыз, – деді Ербол Қарашөкеев.
Дүниежүзілік тазалық күніне арналған сенбіліктер облыс аудандарында да жалғасты.
Айта кетейік, «Таза Қазақстан» бағдарламасы аясында жыл басынан бері ұйымдастырылған акцияларға 79,7 мың адам және 2,1 мыңнан астам кәсіпорын мен мекеме қатысты.
Акциялар барысында 48,5 мың түп жасыл желек отырғызылып, 5,5 мың шақырым көше жолы, 950 шақырым арық жүйесі мен канал, сондай-ақ 750,4 мың шаршы метр саябақтар мен скверлердің аумағы тазартылды. Сонымен қатар 12,1 мың тонна күл-қоқыс шығарылды.
