Қазақстан Төтенше жағдайлар министрлігінің құтқарушылары Алматы облысының тауларында үш күндік іздестіру-құтқару операциясын сәтті аяқтады. Жоғалған турист тікұшақтың көмегімен табылды, деп хабарлады ТЖМ баспасөз қызметі.
1982 жылғы азамат 12 қаңтарда көп күндік жорыққа аттанып, 15 қаңтарда байланысқа шықпаған соң, туыстары мазасызданып, құтқарушылардан көмек сұрады.
ТЖМ Республикалық жедел-құтқару жасағының мамандары дереу іздеуге кірісті. Жұмысқа кинологиялық есептоптар, ұшқышсыз ұшу аппараттары және жерүсті топтары қатысты. Алғашқы екі күнде 21 орын зерттелді, оның ішінде ең танымал туристік маршруттардағы шыңдар, шатқалдар мен асулар тексерілді.
Қазавиақұтқару әуе бортын пайдаланып, ер адам 2970 метр биіктікте «Сол Талғар» шатқалындағы күркеден табылды. Ол медициналық көмекке мұқтаж болмады және Алматы қаласына жеткізілді, – делінген хабарламада.
turkystan.kz
