«Қасақана қауіп төндірді»: Полиция танымал блогер Daricorn-ды жауапкершілікке тартты
https://turkystan.kz/article/259188-qasaqana-qauip-tondirdi-policiia-tanymal-bloger-daricorn-dy-zauapkersilikke-tartty
Daricorn лақап атымен танылған алматылық блогер Дариға Нүркеева жол-көлік ережесін өрескел бұзып, төтенше жағдай туғызғаны үшін жауапкершілікке тартылды, деп хабарлады turkystan.kz.
Бұл туралы Алматы қаласы полиция департаменті мәлім етті.
Полицияның мәліметінше, блогер жол қозғалысы ережелерін демонстрациялық және арандатушылық сипатта бұзғанын анықтаған. Белгі бермей, кенеттен жолақты ауыстырып, төтенше жағдай тудыратын видео түсірген.
«Тергеу қорытындысы бойынша құқық бұзушы әкімшілік құқық бұзушылық туралы кодекстің 595-бабының 1-бөлігі («Дабыл беру талаптарын орындамау») және әкімшілік құқық бұзушылық туралы кодекстің 606-бабының 1-бөлігі («Төтенше жағдай жасау») бойынша әкімшілік жауапкершілікке тартылды», — деп хабарлады Алматы қалалық ІІД.
Сондай-ақ, мұндай әрекеттер жай ғана жауапсыздық емес, басқалардың өмірі мен денсаулығына қасақана қауіп төндіретінін ескертті.
«Мұның барлығы интернеттегі лайк пен комментарий үшін жасалады. Атақ-даңқ, ақша, оқырманы көп болса да жауапкершіліктен босатпайды. Заң бәріне бірдей.
Біз азаматтарды жауапкершілік пен тәртіпке шақырамыз. Қауіпсіздік – ойын немесе әлеуметтік контент емес. Бұл – әркімнің жауапкершілігі», – делінген ведомствада.
