Астанада бір жасқа дейінгі сәбилерді емдейтін аурухана қызметкерінен туберкулез анықталды
Астанадағы №1 қалалық балалар ауруханасының медбикесінен туберкулез табылды, деп хабарлайды shanyraqinfo.kz Ozgeris.info сайты елорданың қоғамдық денсаулық сақтау басқармасына сілтеме жасап.
Бұған дейін әлеуметтік желіде бір жасқа дейінгі сәбилер емделетін ерте жастағы патология бөлімінің қызметкері ауырғаны туралы ресми хат тараған болатын.
Құжатқа сәйкес, маманның оң жақ өкпесінен ыдырау және таралу сатысындағы инфильтративті туберкулез диагнозы нақтыланған. Басқарма мәліметінше, медбике 2026 жылдың ақпан айында флюорографиядан таза өткен, алайда сәуір айында жағдайы нашарлап, дәрігерлерге қаралған.
«Соңғы рет жұмысқа 24 сәуірде шықты, ал 27 сәуірден бастап қалалық фтизиопульмонология орталығында ем қабылдап жатыр», – деді басқарма.
Ведомство ақпаратына қарағанда, науқаспен байланыста болғандар арасында әзірге дерт жұқтырғандар жоқ және аурухананың қайта тексеруден өткен 39 қызметкерінің нәтижесі теріс шыққан.
Оқиғадан кейін мекемеде алдын алу шаралары қолға алынып, байланыста болған адамдар шеңбері анықталды, барлық бөлме мен төсек-орын дезинфекцияланып, палаталарды кварцтау және желдету бақылауға алынды.
Иллюстрациялық сурет. Фото: emirmed.kz
