Шығыс Қазақстан облысында балалар дүкені сауда қызметі туралы заңнаманы бұзғаны үшін жауапкершілікке тартылды. Бұл туралы Stan.kz ақпарат агенттігі хабарлайды.
Сауда және тұтынушылардың құқықтарын қорғау департаментіне дүкендегі тауарлардың бағасы ресейлік рубльмен көрсетілгені туралы арыз келіп түскен.
Жоспардан тыс тексеріс кезінде ақпарат расталды. Кейбір тауарлардың бағасы расымен шетел валютасымен көрсетілген жапсырмалар анықталды. Дүкен басшылығы заңды білмейтіндерін және жұмысшылардың жетіспейтінін айтып ақталған.
Әкімшілік құқықбұзушылық туралы кодекстің 193-бабына сәйкес, тауардың бағасын теңгемен көрсетпеген кәсіпкерлерге кәсібінің ауқымына қарай айыппұл салынады. Бір жыл ішінде қайталанған жағдайда айыппұл ұлғайып, ірі сауда нысандары үшін 200 АЕК дейін жаза қарастырылған.
Бұл жағдайда заңбұзушылықтың қайталанғаны анықталып, кәсіпкерге 200 АЕК көлемінде айыппұл салынды. Бұдан бөлек, дүкенге анықталған заңбұзушылықтарды жою туралы нұсқама берілген
