24.kz
https://turkystan.kz/article/266496-qazaqstandyq-galymdar-zaponiiada-marapatqa-ie-boldy
Осака қаласында өткен ЭКСПО көрмесінде қазақстандық ядролық физика институты Жапония үкіметінің құрмет грамотасы мен медаліне ие болды, деп хабарлайды turkystan.kz сайты 24.kz-ке сілтеме жасап.
Марапат жоғары температуралы газбен салқындатылатын реакторларды зерттеу жобасы үшін берілді. Бұл технология – төртінші буын атом электр станцияларын құрудың негізі.
Жоба халықаралық ғылыми-техникалық орталықтың қолдауымен және Жапония үкіметінің қаржыландыруымен жүзеге асырылуда. Институттың бас директоры Саябек Сахиевтің айтуынша, 15 жыл ішінде отын 1500 градусқа дейін сыналған. Енді жапониялық тарап оны 1600 градусқа дейін сынауды сұрап отыр. Егер нәтижелер сәтті болса, алдағы 2-3 жылда Жапонияда төртінші буын модульдік реакторлардың құрылысы басталуы мүмкін.
Сарапшылардың пікірінше, Қазақстанның ядролық зерттеу әлеуеті жоғары. Халықаралық орталық елдер арасында бәсекелестік емес, ынтымақтастық орнатуды көздейді. Жапония атом энергиясы агенттігінің президенті Масанори Когучидің айтуынша, мамандармен алмасу мен технология трансферті Қазақстан үшін жаңа атом электр станциясын салуда маңызды рөл атқарады.
Қазақ ғалымдары жапон әріптестерімен бірге уран бөліну өнімдерінің жоғары температуралы газбен салқындатылатын реакторларға әсерін одан әрі зерттеуді жалғастырады.
Толық нұсқасына гиперсілтеме беруді ұмытпаңыз: https://turkystan.kz/article/266496-qazaqstandyq-galymdar-zaponiiada-marapatqa-ie-boldy
