Бүгін, 10 қыркүйекте «Медеуде» Геннадий Головкинді қолдау мақсатында ауқымды акция өтеді деп хабарлады turkystan.kz Алматы әкімдігінің Telegram арнасына сілтеме жасап.
Лас-Вегастағы жекпе-жек алдында боксшыны қолдау үшін ұйымдастырушылар жүздеген адамнан GGG жазуын жазып, оны биіктен түсірмекші. Геннадий Головкин мен Сауль Альварес арасындағы жекпе-жек 17 қыркүйекте өтеді.
«Бірлік, ауызбіршілік, топтасу» ұранымен өтетін іс-шара Алматы қаласы бокс федерациясының, мотоциклистер мен парапланеристер клубтарының қатысуымен өтеді. Мұз айдынының ортасына жас боксшылар жекпе-жекке шығатын ринг орнатылады. Онда бокстан шеберлік сыныптары мен викториналар өткізіледі. 14:00-де басталатын акцияға кез келген адам GGG-ді қолдап, қатыса алады.
