28 ақпан 2026, жаңалықтар Turkystan.kz
Мәжіліс депутаты, «AMANAT» партиясы фракциясының мүшесі Айдос Сарым жаңа Ата Заң жобасын талдауға арналған «Жаңа Конституция – жаңа мүмкіндіктер» атты партияаралық дебатта Жаңа Конституцияның барлық бабында ұлттық құндылығымыз басты назарға алынғанын айтты, деп хабарлайды turkystan.kz.
«Жаңа Конституция не үшін керек?», «Ол ел мен жұртқа не береді?», «Оның мақсаты қандай?» деген сұраққа жауап іздейтін болсақ, өз басым үш сөз тіркесімен жауап берер едім. Ол – азат болу, ол қазақ болу, ол асқақ болу.
Азат елге азат азаматтар қажет. Азат азаматтар ғана салығын төлеп, елін қорғайды. Азат азаматтар ғана өз құқығын біледі. Сол себептен азат азаматтарымыздың әділетті еңбегі мен өмірі бізге маңызды. Азаттық дегеніміз – азаматтардың құқықтарының қорғалуы. Әр сотта, әр мекемеде азаматтарды ойы мен пікірі құқықтары биік болуы керек. Бұл – біздің басты міндетіміздің бірі.
Біз дүниеге қазақ болып келдік. Қазақ болып қалуымыз қажет. Мына жаһанданған заманда дүние өзгеріп жатыр. Әр түрлі ойын ережесі қалыптасып келе жатыр. Мұнда біз басқадан өзгешелігімізді сақтап қалуымыз керек. Біздің өзгешелігіміз – ұлттық кодымыз, тіліміз, дәстүріміз, діліміз рухымыз. Осыны сақтай білсек ғана, біз тәуелсіз мемлекет болып қаламыз, осыны сақтап қалсақ ғана іргетасымыз берік болмақ», – дейді депутат.
Айдос Сарымның сөзінше, бізге мұнайға емес, адам энергиясына негізделген экономика қажет
«Конституцияның барлық бабында ұлттық тарихтан бастап ұлттық тіліміз, діліміз насихатталған. Алғашқы сөзі Преамбулада мұның бәрі жазылған. Ең бастысы – еліміздің болашағы осы Конституция арқылы тізбектеліп келе жатыр.
Біз асқақ ұлт болуымыз керек. Жаңа Конституцияны жазған кезде Преамбуладан бастап тарихымызды, бүгінгі күнімізді атап өттік. Ал болашағымыз қандай болады деген сұраққа Конституцияда жауап бар. Тұңғыш рет Конституцияда білім, ғылым, инновация мәселесін үлкен мемлекеттік саясаттың негізі деп таныдық. Біз Конституцияда тұңғыш рет әлемде бірінші болып өзіміздің цифрлық құқықтарымызды жаздық. Күнделікті өміріміз қалай өтетін болса, цифрлық өміріміз де солай қорғаулы қажет деп есептейміз. Мұның бәрі – еліміздің болашақ бағыт-бағдарын, қайа дамитынын қалай өрбитінін айқындайтын дүниелер. Бізге мықты бизнес, азаматтардың ой-еркіндігі қажет. Осы арқылы ғана біз елімізді дамыта аламыз. Конституцияда осы себептен де адамның үйі, мүлкі бизнесі өте жақсы қорғалған. Мұның бәрі бір нәрсені меңзейді. Бізге мұнайға емес, адам энергиясына негізделген экономика қажет. Осы себептен де біздің ұлтымыз асқақ болу керек. Жаңа замандағы бәсекелестік бағзы замандағыдай әскери күшпен ғана өлшенбейді, ол адамның біліктілігі, инновацияға дайындығы, жаңа заманға ашықтығымен өлшенеді. Осы себептен де осындай өркениетті бәсекеге дайын екенімізді паш етуіміз керек», – дейді депутат сөз соңында.
Толық нұсқасына гиперсілтеме беруді ұмытпаңыз: https://turkystan.kz/article/277053-izge-munaiga-emes-adam-energiiasyna-negizdelgen-ekonomika-qazet-aidos-sarym
