Ауыл – ел бесігі. Бұл қағидамен өмір сүріп, туған жердің өркендеуіне өз үлесін қосып жүрген азаматтардың бірі – Арман Түлеганов. Ол 2014 жылы «Алаша» шаруа қожалығын құрып, ауыл шаруашылығы саласына білек сыбана кіріскен еді. Бүгінде бұл шаруашылық мал өсірумен қатар, егін егумен де айналыса отырып, өңірдегі шағын және орта кәсіпкерліктің дамуына сүбелі үлес қосып келеді.![]()
– Алғашқы кезде тек мал шаруашылығына ден қойдық. Жылдар өте келе техника, тәжірибе, жұмыс күші жинақталып, егін егу ісін де қолға алдық. Мемлекеттік бағдарламалардың арқасында шаруашылықты кеңейтуге мүмкіндік туды. Қазір ауыл тұрғындарына көмегіміз тиіп жатқанына қуаныштымыз, – дейді ШҚ басшысы Арман Түлеганов.![]()
Мемлекет басшысы Қасым-Жомарт Тоқаев 2025 жылды «Жұмысшы мамандықтарының жылы» деп жариялап, еңбек адамын құрметтеуге баса мән беріп отырған тұста, дәл осындай кәсіп иелерін көпке үлгі ету – парыз. Арманның жары – Мирамгүл Түлегенова да бұл бағытта белсенділік танытып келеді. Ол «Ауыл аманаты» бағдарламасы аясында 2,5 пайызбен несие алып, картоп егіп, өз ісін бастады.
– Мемлекеттік қолдаудың арқасында біз тек отбасы табысын арттырып қана қоймай, ауылдың азық-түлік қауіпсіздігіне де үлес қосып келеміз. Картоп егісін кеңейтіп, болашақта өз өнімімізді нарыққа шығарсақ деген жоспарымыз бар, – деген жоспарымен бөлісті Мирамгүл Мақсотқызы.
Ауылдық округ әкімі Мәди Сатыбалдиев шаруашылық иелерінің белсенділігіне ризашылығын білдіріп:
– «Алаша» шаруа қожалығы ауылымыздың тірегіне айналды. Тек мал өсіріп, егін егіп қана қоймай, қайырымдылық шараларына, ауылдағы түрлі игі бастамаларға белсене атсалысып келеді. Арман мен Мирамгүлдей еңбекқор азаматтар – ауыл болашағының кепілі, – деп ризашылығын білдірді.
Ендеше бүгінгі күні мұндай шаруашылықтар – ауылды дамытудың нақты мысалы. Кәсіпке адалдықпен, еңбекке сүйіспеншілікпен қараған адамдар арқылы ғана ауыл өмірі жанданады.
Аудандық кәсіпкерлік және ауыл шаруашылығы бөлімінің басшысы «Алаша» шаруа қожалығының жұмысына оң бағасын беріп:
-Бүгінгі таңда ауданымыз бойынша 2590 га жерге 6 шаруа қожалығы мақсары екті.«Алаша» ШҚ биыл 200 гектар жерге майлы дақыл – мақсары егіп, дер кезінде күтім жасап, өнімді толықтай жинап алды. Бұл – уақытпен санасып, ауа райының қолайсыздығына қарамастан еңбек еткен жандардың тынымсыз еңбегінің нәтижесі. Сонымен қатар, мемлекет тарапынан көрсетіліп отырған қолдауларды тиімді пайдаланып отыр. Шаруашылық мемлекеттік бағдарламаларға белсенді қатысып, соңғы жылдары бірнеше ауыл шаруашылығы техникаларын жаңартты. Бұл – еңбек өнімділігін арттырып, жұмыс сапасын жақсартуға септігін тигізеді,»- деді.
Осындай іргелі шаруашылықтардың көбеюі – ауданымыздың ауыл шаруашылығы саласының дамуына серпін беретіні сөзсіз.
Әрбір елдің дамуы экономикасы мен оның ахуалына тәуелді екенін ескерсек, ауыл шаруашылығы, агроөнеркәсіп кешенінің аса зор әлеуетке ие екендігін сезіне түсеміз.Тынымсыз тірлік еткеннің мерейі қашанда үстем. Осыны білетін «Алаша» шаруа қожалығының басшысы Арман Русланұлы мал басын көбейтіп,жемшөп қорын жасақтап,егіс егумен де айналысып қажырлы еңбек етуде.Шаруашылықты жүргізудің тиімді әдістерін меңгеру,тәжірибе алмасу бағытында облыстық,аудандық шараларға үнемі қатысып отырады.
«Еңбек, адамға қашанда еңбек керек,»– деген оның сөзінен жас болса да жер қадірін ұғынған,мал бағымының қыр-сырын,техниканың тілін мықты меңгерген азамат екенін байқадық. Берекені еткен еңбегінен тілеген ,еңбекті кірістің көзі,ырыстың өзі деп бағалаған Тулегановтарға еңбектеріңіз жемісті болсын демекпін!
