«AMANAT» партиясы Жамбыл облыстық филиалы жанындағы «Экологиялық мәселелер» жөніндегі аймақтық кеңестің отырысы өтті.
Кеңесте өңірдің экологиялық жағдайына қатысты бірқатар мәселелер көтерілді. Мәселен, облыстық экология департаменті басшысының орынбасары Темір Смағұлов «Қазфосфат» ЖШС-нің Тараз қаласынан 20 шақырым қашықтықта орналасқан фосфогипс қалдықтарының экологиялық жағдайға әсер етуі туралы баяндама жасады. Оның айтуынша, қалдықты қаланың Хамукат алқабындағы шұңқырға төгіп, үстін топырақпен жабу туралы ұсыныс көтеріліп жатқанын жеткізді. Десе де бұл экономикалық тұрғыдан тиімсіз. Себебі, қалдықты тасумен қатар тал егу де қыруар жұмысты талап етеді. Сондықтан кеңесте көтерілген мәселелер республикалық кеңеске жолданатын болады.
Жергілікті атқарушы органдардың тарапынан облыс бойынша мыңдаған көшеттер отырғызылып жатыр. Алайда, егілген екпелердің өніп шығуы үшін жасалған жағдайлардың болуы күмән тудырады. Себебі, Тараз қаласында жылына қаншама талдар егілседе, олардың шығып жатқаны байқалмайды. Бұл мәселелер бойынша облыс әкімдігінің энергетика және тұрғын-үй коммуналдық шаруашылығы және табиғи ресурстар және табиғатты пайдалануды реттеу басқармалары мен Тараз қаласы әкімі орынбасарларының есебін тыңдалды.
Бұл мәселеде жергілікті атқарушы орган өкілдерінің жауапкершілігін арттыру мәселесі көтерілді. Аталған мәселе партия назарында болады.
