Достық үйінде «Қазақстан ұйғырлары республикалық этномәдени орталығы» қоғамдық бірлестігінің төрағасы Алиев Долкунтай Абдулхалилұлы облыстық М.Қашқари атындағы ұйғыр этномәдени бірлестігінің мүшелерімен кездесті.
Келелі жиынға ҚР Ұлттық Құрылтай мүшесі Нурумов Шаймардан, аталмыш бірлестіктің аймақтағы филиалының төрағасы Мухабат Турдыева, бірлестік өкілдері мен «Қоғамдық келісім» КММ ұжымы, сондай-ақ өзге де этномәдени бірлестік жетекшілері қатысты.
Онда ҚР Президенті Қасым-Жомарт Тоқаевтың XXXIV сессиясындағы тапсырылған жүктемелерін орындау әрі қолдау, Ассамблеяның 30 жылдығы аясында республикалық бірлестіктің атқаратын іс-шаралары төңірегінде мазмұнды баяндама жасалып, ұсыныстар айтылды.
М.Қашқари атындағы ұйғыр этномәдени бірлестігі – аймақтағы қоғамдық келісім мен бірегейлікті сақтауға үлес қосып келе жатқан белсенді ұйым. Аталған бірлестіктің атқарған игілікті істері мен толайым табыстары туралы жиын барысында өңірлік филиал төрағасы Мухабат Абдырахманқызы мәлімдеп өтті.
Бұдан соң ҚР Ұлттық Құрылтай мүшесі Нурумов Шаймардан сөз алып, республикалық Ұйғыр этномәдени орталығының еліміздегі қайырымдылық шараларына белсене араласатындығын айта келе, биылғы Ұлттық құрылтайда көтерілген өзекті мәселелерге тоқталып, мемлекеттік тіл – біздің тұтастығымыз екендігін баса айтты.
Өз кезегінде «Қазақстан ұйғырлары республикалық этномәдени орталығы» қоғамдық бірлестігінің төрағасы Долкунтай Абдулхалилұлы бірлігі бекем елдің тірлігі көркемдігін тілге тиек етіп, тұрақтылық пен тұтастық жолында еңбек етіп келе жатқан облыстық бірлестікке алғысын білдірді.
Сонымен қатар, кездесуде ақпарат және қоғамдық даму басқармасы «Қоғамдық келісім» КММ басшысы Мубарак Қасымқызы аймақтық филиалдың тындырымды тірліктеріне тоқталып, мекеме жұмысымен таныстырып өтті. Ал Қазақстанның ұйғыр жастар одағының төрағасы Рустам Қайрыев болса жетекшісі Хамида Турдыева бастаған облыстық «Ассамблея жастары» қоғамдық бірлестігінің жұмысына жоғары бағасын беріп, сәттілік тіледі.
Өзге де бірқатар азаматтар облыстық бірлестіктің мардымды істеріне тоқтала өтті.
Шара соңында бірқатар азаматтарға «Қазақстан ұйғырлары республикалық этномәдени орталығы» қоғамдық бірлестігінің «Сахавәт» және «Койүмчан» медалі табыс етілсе, еліміздегі халықтар достығы мен қоғамдық келісімді нығайтуға қосқан үлесі және Жаңа Қазақстан құру жолындағы белсенділігі үшін облыстық бірлестіктің өкілдеріне алғыс хаттар табысталды
