Қазан айының екінші жексенбісі елімізде Мүгедектер күні ретінде белгіленген. Осы атаулы күн аясында Тараз қаласындағы №5 Арнаулы әлеуметтік қызметтер ұсыну орталығында мейірім мен ізгілікке толы шара ұйымдастырылды.
Іс-шара басталмас бұрын ата-аналар мен жақын туыстар орталықтағы қызмет алушылардың жағдайымен танысып, көрсетіліп жатқан әлеуметтік және медициналық қызмет түрлерін көрді. Қонақтар алдымен ем алушылар жасаған ою-өрнектері мен қылқалам туындыларын тамашалады. Сондай-ақ сумен емдеу, массаж жасау, жүйке жүйесін реттеу, тынығу бөлмелері, асхана және жаттығу залдарының жұмыс барысымен танысты.
Салтанатты жиында орталық директоры Балабек Нарбаев сөз сөйлеп, мұндай шаралардың ата-аналар мен орталық арасындағы сенімді нығайтуға бағытталғанын атап өтті.
– 2014 жылы іргетасы қаланған бұл орталықта арнаулы әлеуметтік қызметтердің сегіз бағыты толық қамтылған. Атап айтқанда, тұрмыстық, медициналық, психологиялық, педагогикалық, еңбек, мәдени, экономикалық және құқықтық бағыттар бойынша қызмет көрсетіледі. Бүгінде мұнда 400-ге жуық қызметкер аянбай еңбек етіп, 550 қызмет алушыға барынша қолайлы жағдай жасауда. Әрине, барлық ата-ананы бір мезетте шақыру мүмкін емес. Сол себепті өткен жылдан бастап «Ашық есік күнін» дәстүрлі түрде ұйымдастыру қолға алынған. Биылғы шараға еліміздің түкпір-түкпірінен 70 ата-ана арнайы келіп қатысты. Бұл бастаманың басты мақсаты – Мемлекет басшысы Қасым-Жомарт Тоқаев атап өткендей, ашықтық қағидатын ұстану. Себебі әрбір ата-ананың жүрегінде «Балам қандай ортада өмір сүріп жатыр?» деген алаң бар. Осы орайда ата-аналар өз көздерімен орталықтағы жағдайды көріп, қызмет көрсету бағыттарымен танысты. Көпшілігі: «Балам осындай қамқор ортада, мейірімді жандардың жанында екенін біліп, көңіліміз орнына түсті» деп шынайы ризашылықтарын білдірді. Олардың көзіндегі қуаныш пен алғысты көріп, біз де еңбегіміздің еленіп, сенімнің ақталғанына қуаныштымыз, – деген Балабек Жәнібекұлы орталықтағы ерекше күтімді қажет ететін жандарға қамқорлық танытып, қолдау көрсеткен бірқатар азаматты Алғыс хаттармен марапаттады.
Сонымен қатар жиын барысында емделушілердің туыстары да орталық қызметіне жоғары баға беріп, мамандарға алғысын білдірді.
– Осы орталықта менің туған інім – Жақып Әлімбек есімді азамат жатады. Тағдырдың жазуына не шара, әке-шешемізден ерте айырылып, өмірдің сан түрлі сынағына тап болдық. Күнделікті күйбең тірлік, жұмыстың тығыздығы мен тұрмыстың тауқыметі кейде үйде болуға мүмкіндік бермейді. Ал науқас адамға күтім, қамқорлық пен жан жылуы қажет екенін жақсы білеміз. Сол себепті амалсыздан бауырымды осы орталыққа орналастыруға тура келді. Бүгін, міне, көптен бері ішімде жүрген сағынышымды басып, інімнің жағдайын білуге келдім. Інімнің көңілі көтеріңкі, жүзінен жылылық сезіндім. Бұл да осындағы ұжымның мейірім мен жанашырлыққа толы еңбегінің нәтижесі деп білемін. Осы орайда өз атымнан және отбасымның атынан ініме және өзге де ем алушыларға жан жылуын сыйлап жүрген барлық дәрігерлерге, медбикелерге, әлеуметтік қызметкерлер мен орталық басшылығына шынайы алғысымды білдіремін, – деді ем алушының туысы Көшер Сағатов.
Шараның соңы орталықтың өнерлі қызмет алушылары – Евгений Курган, Акерке Ибрагимова секілді өнерпаздардың концерттік бағдарламасына ұласты.
Жұматай КӨКСУБАЙ
