«Менің атым — шексіздік» атты мүмкіндігі шектеулі балалардың облыстық өнер байқауы өтті

Жамбыл облысы әкімдігінің мәдениет және тілдерді дамыту басқармасының Шерхан Мұртаза атындағы руханият және тарихтану орталығы «Атпал» жауапкершілігі шектеулі серіктестігінің демеушілігімен және журналист, қоғам белсендісі Құралай Сейсенбекқызының ұсынысымен мүмкіндігі шектеулі ерекше білім беру қажеттіліктері бар балалардың, шығармашылық қабілеттерін дамыту және қазақстандық қоғамда инклюзивті ортаны қалыптастыруға ықпал ету мақсатында  «Менің атым — шексіздік»  атты облыстық өнер байқауын ұйымдастырды.

Аталмыш байқауға барлығы ән және би бағыты бойынша 19 өтінім келіп түсті. Онда барлығы 39 ерекше бала қатысты. Олардың ішін Сарысу, Талас, Т.Рысқұлов, Меркі, Байзақ аудандары мен Тараз қаласынан қатысушылар болды. Олардың арасында жанды дауыста домбыра, баян, күйсандық сияқты аспаптардың сүйемелдеуімен де ән айтқандар болды. Қоларбамен би билеген жас бүлдіршіндер тіпті көрермен көзайымына айналып, ыстық ықыласқа бөленді.

Іс-шараның басы Жамбыл облыстық «Асқар Тоқпанов» атындағы драма театрының актрисасы Аружан Райымбектің орындауындағы «Менің атым — шексіздік» монологімен басталып, көрермендерді ерекше тебірентті.

Байқау қатысушыларына сәттілік тілеп, іс-шараны ресми Шерхан Мұртаза атындағы руханият және тарихтану орталығының директоры Жасұлан Әбдіманап ашып, сөз сөйледі.

Байқауда үміткерлердің өнерін Жамбыл облыстық филормониясы, Қазақ өнерінің әншісі, мәдениет саласының үздігі Мадина Сағымбекова, Инклюзивті білім берудегі психологиялық бейімделу орталығының үйлестірушісі Рақымбай Ержан, Оқушылар сарайының «Хореография» студиясының қосымша білім беру педагогі, педагог-хореограф Костащук Ирина Владимировна, Жамбыл облысы әкімдігінің білім басқармасының Мектеп олимпиадаларын және мектептен тыс іс-шараларды өткізетін облыстық орталықтың “Бұқаралық” бөлімінің меңгерушісі Қанапина Қарлыға Жамбылқызы және «Атпал» ЖШС-нің директоры Гүлсара Жаманқұлқызы Байдуанова бағалады.

Байқауға облысымыздың кез-келген өңірінен 6-18 жас аралығындағы (ән және би номинациясы бойынша) мүмкіндігі шектеулі өнерлі балалар қатысты. Жеңімпаздарды анықтау барысында 6-12 және 13-18 жар ерекшелігіне қарай да үздіктер марапатталды.

Ән байқауы бойынша кіші топта:  1-орын – Байбосын Айзере, 2-орын – Берік Асезім, 3-орынды теңдей Акимбай Маулен мен Дүйсеналы Алижан жеңімпаз атанды.

Ал дәл осы ән бағыты бойынша үлкен топтарда: 1-орын — Еламан Салауат, 2-орын — Бердібек Жансая, 3-орын — «Қыздарай» ансамблі жеңімпаз атанды.

Би байқауы бойынша кіші топтарда үздік өнер көрсеткен: 1-орын — «Өркен» арнайы мектеп-интернатының «Аса таяқ» биін билеген қыздар тобы, 2-орынды — Тараз қаласының №32 орта мектебінің оқушысы Бабажанова Шахноза мен Тараз қаласы №47 орта мектебінің оқушысы Айтқұл Жұлдыз теңдей бөліп алса, 3- орынды – меркілік Абуева Реана мен Хамза және «Қара жорға» биін билеген Тараз қаласының №63 орта мектебінің оқушысы Майлибаев Нуриман, «Балашақ» мектеп-интернатының «Еркеназ» би тобы алды.

Би байқауының үлкен топтары арасында үздік өнер көрсеткен: 1-орын — Ахмедова Лора, 2-орын — Махамбет Гүлмарал, 3-орын – «Өркен» би тобы иеленді.

Барлық қатысушылар дипломдармен, алғысхаттармен және естелік сыйлармен марапатталды.

Аталмыш іс-шараны республикалық байқаулардың жеңімпаздары, дарынды ерекше балалар Сағындық Айсана, Шыңғысбай Руслан, Серікбай Ғалымжан жүргізіп, өнерлерімен келген қонақтарды тәнті етті.

«Менің атым – Шексіздік» байқауы – бұл тек өнер жарысы емес, адам жанының мейірімге, өмірдің мәніне деген сенімінің айғағы. Ерекше балалар сахнада өз армандарын, үмітін және шексіз мүмкіндігін көрсетті. Мұндай іс-шаралар қоғамның рухани жаңғыруына, инклюзивті мәдениеттің нығаюына және әр баланың жүрегінде жарқыраған жұлдызды көруге мүмкіндік береді.

Фарида МЕТЕРҚҰЛОВА,

Ш.Мұртаза атындағы руханият және тарихтану орталығының аға ғылыми қызметкері