Мойынқұм ауданының әкімі Ермек Карентаев «Turan Industry» ЖШС басшыларымен Мирный ауылы маңында кездесу өткізді. Кездесудің басты мақсаты – біраз уақыттан бері өндірісі тоқтап тұрған гранит зауытын қайта іске қосу мәселесін қарастыру болды.
Кездесуге аудан әкімінің орынбасары Қуандық Төлеубеков, аудан әкімі аппаратының басшысы Нұркелді Қазақбайұлы, аудан әкімдігі кәсіпкерлік және өнеркәсіп бөлімінің басшысы Талғат Үсенбаев, сондай-ақ зауыт өкілдері қатысты.
Тараптар зауытты қайта жандандыруға қатысты негізгі мәселелерді талқылап, ортақ шешімге келді. Аудан әкімдігі инфрақұрылымды дамыту мен қажетті қолдау көрсетуге дайын екенін мәлімдеді. Өз кезегінде компания өкілдері өндірісті жыл соңына дейін іске қосып, келер жылы жаңа жұмыс орындарын ашуға және жергілікті бюджетке салық түсімдерін қамтамасыз етуге міндеттенді. Айта кетейік бұл компания маусымдық режиммен жұмыс істейтін мекеме.
Бұл келісім аудан экономикасына серпін беріп қана қоймай, жергілікті халық үшін жаңа жұмыс мүмкіндіктерін ашатыны сөзсіз.
