Маңғыстау облысының Бейнеу ауылында екі мектеп оқушылары арасында жаппай төбелес болды. Оқиға түсірілген видеолар желіде жылдам тарап жатыр.
Instagram-дағы парақшаларда видео жарияланып жатыр. Кадрлардан төбелес басталған кезде полицейлер жақын жерде болғанын байқауға болады.Олар оқушылар бір-бірімен төбелесе бастағаннан ажыратуға тырыспақ болып жүгіреді. Видеодан оқушылардың көп болғаны көрінеді.
Маңғыстау облыстық полиция департаменті жағдайға түсініктеме берді.
«25 мамыр күні сағат 11.00-де Бейнеу ауданының Бейнеу ауылында Ж.Қалдығараев және Ы. Алтынсарин атындағы мектеп оқушылары арасында төбелес болды. Оқиға орнында жеті адам ұсталып, мән-жайды анықтау үшін полиция бөлімшесіне жеткізілді. Жәбірленушілер жоқ. Соңғы қоңырау күніне байланысты полиция күшейтілген режимде қызмет атқаруға көшті», – деп хабарлады полицияда.
Аталған факті Қазақстан Қылмыстық кодексінің 293-бабы «Бұзақылық» бойынша тіркелді.
Маңғыстау облысының полиция департаменті түлектердің ата-аналарына кәмелетке толмаған балалар үшін жауапкершілік туралы ескертіп, мектеп оқушыларын қадағалауды күшейтуге шақырады.
