“Ұстаз – ұрпақтың ұлы темір қазығы, ал ардагер ұстаз – сол жолды жарық еткен шамшырақ.” Ұрпақ тәрбиесіне саналы ғұмырын арнаған ардагер ұстаздардың еңбегі ел жадында мәңгі сақталады. Осындай абзал жандардың қатарында Сарысу ауданының Құрметті азаматы, Ұлы Отан соғысы жылдарындағы тыл ардагері, ұзақ жылдар бойы жас ұрпаққа білім нәрін сепкен ұлағатты ұстаз – Әділбеков Жұмашбек ағай бар.
1936 жылы Сарысу ауданының Ынтымақ ауылында дүниеге келген Жұмашбек ағай өмірінің барлық кезеңін ел игілігіне арнады. Ұлы Жеңісті жақындатуға тылда еңбек етсе, кейіннен «Сарысу» орта мектебінде 40 жылдан аса уақыт мұғалім, оқу ісінің меңгерушісі, мектеп директоры қызметтерін атқарды. Ол – Қазақ ССР халық ағарту ісінің озық қызметкері, көптеген марапат иесі. Қызметпен қатар, ауылдың қоғамдық өміріне де белсене араласты. Ұзақ жылдар бойы сайлау комиссиясының хатшысы, аудандық халық сотының заседателі, ардагерлер кеңесінің төрағасы болып еңбек етті. Бүгінде 12 ұл-қыздан өрбіген 45 немере, 25 шөбере сүйіп отырған ауданның абыз ақсақалы.
Сонымен бірге, Байқадам Қашқынбаев атындағы мектептің бастауыш сынып мұғалімі болған Қалдыкүл Мұсабаева, Ыбырайым Сүлейменов мектебінің ардагер ұстазы, 40 жыл бойы қазақ тілі мен әдебиеті пәнінен сабақ берген Күнімай Омарова сынды аяулы ұстаздарымыздың еңбегі де ерекше құрметке лайық.
«Ұстаздар күні» мерекесіне орай Сарысу ауданының білім бөлімінің басшысы Жуаныш Қалықбергенұлы ардагер ұстаздардың шаңырағына арнайы барып, ілтипат көрсетіп, сый-құрмет жасады. Бұл – ұстаз еңбегіне деген халықтың ыстық ықыласы мен тағзымының айғағы.
Ұстаздық жол – ұлттың рухани байлығы мен болашағына бағытталған ұлы мұра. Ардагер ұстаздарымыздың өнегелі өмірі мен еңбегі жас ұрпаққа әрдайым үлгі болып қала бермек.
