Алматы қаласының №2 қалалық перинаталдық орталығында үшем дүниеге келді, — деп хабарлайды Massaget.kz тілшісі Қоғамдық денсаулық сақтау басқармасының баспасөз қызметіне сілтеме жасап.
38 жастағы қала тұрғыны кесар тілігі арқылы үш қыз дүниеге әкелген. Ота сәтті өткен, жаңа туған нәрестелердің салмағы: 1970 грамм, 1990 грамм, 1960 грамм.
2013, 2018 және 2019 жылдары үш баласын дүние әкелген ананың бұл — төртінші жүктілігі.
«Сәбилер дүниеге келгеннен кейін жансақтау бөлімінде бірнеше күн жатып, қажет ем алды. Қазір олар аналарымен бірге палатаға ауыстырылды, жағдайы жақсы», — деді неонатология бөлімінің меңгерушісі Айнұрым Сарбас.
Үшемнің анасының айтуынша, алғашқы скрининг кезінде бірден үш сәби екенін білген.
«УДЗ дәрігері менде үш эмбрион бар дегенде таңғалдым. Біздің әулетімізде әжемнің тарапында егіз болған, бірақ ешкімде үшем болған емес.
Анализдерім жақсы болмағандықтан, осы перинаталдық орталыққа, патология бөліміне түстім. Дәрігерлердің күш-жігерінің арқасында балалардың салмағы қанағаттанарлық болғанда, кесарь тілігін жасауды ұйғарды. Енді отбасымызда бес қыз, бір ұл болды. Өте қуаныштымыз!» — деді бақытты ана.
Айта кетейік, биыл 10 айда Алматыда 39 750 бала дүниеге келді, оның 445-і — егіз, 8-і — үшем.
Фото: depositphotos.com
https://massaget.kz/news/tukyimyimyizda-bolgan-emes-almatyida-ushem-duniege-keld-121257/?fbclid=IwY2xjawG62MhleHRuA2FlbQIxMQABHX1-HzKbgUxTlANPm0xWxM7JZVxfhHKdmwd2SSDh8Jyp_d2EUx5Du6pvlQ_aem_vLcH08c-fGJI-Rlgbdqxvw
