Биыл күллі Қазақ елі дарынды композитор, Қазақстанның еңбек сіңірген қайраткері, Қазақстанның және КСРО-ның халық әртісі, Қазақстан Мемлекеттік сыйлығының лауреаты Сыдық Мұхамеджановтың 100 жылдық мерейтойын кең көлемде атап өтуде.
Артына өшпес із қалдырған дара тұлғаның балалық шағы киелі Меркі жерінде өтіп, оқушы Сыдық Мұхамеджанов осы Меркі ауданының Тұрар Рысқұлов атындағы №20 жалпы орта білім беретін мектебінде сол кездері білім алғаны біз үшін үлкен мәртебе, әрі қуаныш.
Композитордың 100 жылдығына орай Меркі ауданындағы өзі білім алған оқу ордасына мемориалдық тақта орнатылды.Сондай-ақ осы күні «ҰЛТТЫҚ МУЗЫКАНЫ ҰЛЫҚТАҒАН КОМПОЗИТОР» атты ғылыми-танымдық конференция ұйымдастырылды.Шара барысында музыка зерттеушілері мен ғалымдар С.Мұхамеджановтың шығармашылығына шолу жасады. Салтанатты шараларға арнайы қатысып, тау тұлғаның рухына тағзым еттім.Жамбыл жері — талай тарланды тудырған киелі өлке. Ұлтының мақтанышына айналған азаматтардың есімін дәріптеп, өскелең ұрпаққа насихаттау — ортақ міндетіміз. Сондықтан еліміздің алтын қорына айналып, шуақты лиризмге тұнған балалық, жастық шақ, бейбітшілік, еңбекті жыр еткен дарынды композитордың әндері мен романстары ел жадында мәңгілік сақталмақ.Серік Сәлемов, Жамбыл облысы әкімінің орынбасары
