Жамбыл облыстық айтыскер ақындар, жыршы-термешілер орталығында Панабек Ахметов пен Төрехан Көрпебаевтың «Әулиеата мақамдары» атты кітабының салтанатты тұсаукесер рәсімі өтті. Аталған шараға мәдениет және білім саласының өкілдері, өнер қайраткерлері, жыршы-термешілер, ақындар, кітапхана және музей қызметкерлері, сондай-ақ өнерсүйер қауым қатысты.
«Әулиеата мақамдары» жинағы – Әулиеата (қазіргі Жамбыл облысы) өңірінде қалыптасқан жыршылық-термешілік өнер мектебіне арналған алғашқы жүйелі ғылыми-тәжірибелік еңбек. Кітапта қазақ халқының ғасырлар бойы қалыптасқан рухани мұрасының өзегі саналатын жыр, терме және мақам дәстүрі кеңінен қамтылған. Жинақта Жамбыл Жабаев, Майлықожа Сұлтанқожаұлы, Кенен Әзірбаев сынды ұлы жыр алыптарының шығармалары мен осы өңірге тән көне мақам үлгілері алғаш рет ноталық нұсқаларымен бірге ұсынылып отыр.
Іс-шараның шымылдығы «Кенен сазы» ансамблінің әншісі Айдын Тілепалдиеваның орындауындағы Кенен Әзірбаевтың «Бастау» әнімен ашылды. Алғашқы құттықтау сөз Байзақ ауданы мәдениет бөлімінің басшысы Сәкен Сыздықов пен Облыстық айтыскер ақындар, жыршы-термешілер орталығының директоры Ахметжан Өзбековке берілді.
Музыкалық бағдарлама барысында жетіген мен домбыра аспаптарының дуэті Нұрғиса Тілендиевтің «Аққу» шығармасын орындап, көрерменге рухани әсер сыйлады. Бұдан кейін ортаға кітап авторлары Панабек Ахметов пен Төрехан Курпебаев шақырылып, жинақтың мазмұны мен мақсаты туралы баяндады.
Кітаптың тұсаукесер лентасын Кенен Әзірбаев атындағы облыстық филармониясы «Тараз» триосының әншісі Асылхан Шүңіреков пен ақын, сазгер, Байзақ ауданының Құрметті азаматы Қасқырбай Нарбатыров қиды.
Іс-шара барысында бірқатар қонақтар құттықтау сөз сөйлеп, авторларға жылы лебіздерін білдірді. Атап айтқанда, Байзақ аудандық мәдениет бөлімінің басшысы Сәкен Сыздықов, «Amanat» партиясы Байзақ аудандық филиалының төрағасы Индира Әбілханқызы, Абай атындағы Жамбыл гуманитарлық жоғары колледжі директорының тәрбие ісі жөніндегі орынбасары Айгүл Сатыбалдиева, ақын Берік Қалиев, Кенен Әзірбаев атындағы облыстық филармониясы директорының орынбасары, ҚР Мәдениет саласының үздігі Жандос Омаров, Мектеп олимпиадаларын және мектептен тыс іс-шараларды өткізетін облыстық «Жамбыл дарыны» орталығының директоры Балдай Төленқызы, Байзақ аудандық тарихи-өлкетану музейінің директоры Артық Үкібаев және Байзақ аудандық орталықтандырылған кітапханалар жүйесінің директоры Нұржамал Сапаралиева сөз алды.
Қорытынды концерттік бөлімде ҚР Мәдениет саласының үздігі, К.Әзірбаев атындағы облыстық филармониясының әншісі, М.Х. Дулати атындағы университеттің «Музыка және көркемдік білім беру» кафедрасының аға оқытушысы Айгүл Мақашова Майлықожа Сұлтанқожаұлының «Насихат» термесін орындады. Сондай-ақ халықаралық айтыскер ақындар, жыршы-термешілер одағының мүшесі, республикалық домбырашылар бірлестігінің Жамбыл облысы бойынша төрағасы, Кенен Әзірбаев атындағы облыстық филармониясының күйшісі Дидар Басығараев арнау тарту етті.
Шара «Кенен сазы» ансамблінің орындауындағы Әбдімомын Желдібаевтың «Ерке сылқым» күйімен қорытындыланды.
