Көлік вице-министрі Жәнібек Тайжанов Жамбыл облысының тұрғындарымен кездесті
Көлік вице-министрі Жәнібек Тайжанов Жамбыл облысының тұрғындарымен кездесу өткізіп, жеке мәселелер бойынша азаматтарды қабылдады.
Кездесу барысында өңірдің көлік инфрақұрылымын дамыту және көлік қолжетімділігін арттыруға қатысты кең ауқымды мәселелер көтерілді. Атап айтқанда, тараздықтар әуе бағыттарының желісін кеңейту қажеттігін жеткізді. Олар Орал, Ақтау, Павлодар, Қостанай және Семей қалаларына әуе қатынасын ашу мүмкіндігін қарастыруды ұсынды.
Тұрғындар сондай-ақ Түрксіб станциясындағы теміржол өткелінде жиі туындайтын көлік кептелістерін атап өтіп, автомобиль көлігіне арналған көпір салу қажеттігін жеткізді. Сонымен бірге теміржолға тиесілі электр желілерін жергілікті атқарушы органдардың қарауына беру, Шу станциясында пойыздардың тоқтау мүмкіндігін қарастыру, Жанатас–Қаратау–Тараз бағытындағы пойыз маршрутын Алматыға дейін ұзарту және оның жыл бойғы тұрақты кестесін бекіту жөнінде ұсыныстар айтылды.
Бұдан бөлек, аудан орталықтарында шағын әуежайларды ашу перспективасы және Құйық асуындағы автомобиль жолының жөндеу жұмыстарын аяқтау мәселелері талқыланды.
Кездесуден кейін вице-министр азаматтарды жеке қабылдады. Қабылдау барысында жолаушылар тасымалына қатысты мәселелер, соның ішінде автобустар сатып алуға арналған лизинг шарттарын қайта қарау, автовокзалдар мен қоғамдық көлікті дамыту, сондай-ақ көлік қозғалысы қарқынды аймақтарда жаяу жүргіншілер өткелдерін орнату мәселелері қаралды.
Кездесу және жеке қабылдау қорытындысы бойынша вице-министр барлық көтерілген мәселелерге қатысты түсініктеме беріп, ұсыныстар министрліктің тиісті құрылымдық бөлімшелерінде қаралып, хаттамаға енгізілетінін атап өтті.
