Жамбыл облысының мектепке дейінгі білім беру жүйесінде елеулі өзгерістер мен жетістіктер байқалуда. Қазіргі уақытта өңірде 618 мектепке дейінгі ұйым жұмыс істейді, онда 62 384 бала тәрбиеленуде. Оның ішінде 278 жекеменшік балабақшада 28 881 бала тәрбие алуда. Бұл көрсеткіш балаларды қамту деңгейінің 91,3%-ға жеткенін көрсетеді.
Сонымен қатар, 2-6 жас аралығындағы балалар арасында 7079 бала әлі де балабақша кезегінде тұр. Осы мәселені шешу үшін биыл 3459 орындық 33 жекеменшік балабақша ашылды. Бұл шараның нәтижесінде 2-6 жас аралығындағы балаларды қамту үлесі 95%-ға дейін артты.
2024 жылдың наурыз айында Қазақстан Республикасы Оқу-ағарту министрлігінің №53 бұйрығына сәйкес, Тараз қаласында мектепке дейінгі ұйымдарға ваучерлік қаржыландыру жүйесінің пилоттық жобасы бастау алды. Бұл бастама 2024 жылдың шілде айынан бастап толық іске қосылып, қаладағы 172 балабақша (оның ішінде 60 мемлекеттік және 112 жекеменшік) жаңа жүйеге өтті.
Қазіргі таңда бұл жүйе облыстың 10 ауданына кезең-кезеңімен енгізіліп жатыр. Байзақ, Жамбыл, Жуалы, Қордай, Меркі, Т. Рысқұлов және Сарысу аудандарында ваучерлік қаржыландыру жүйесі толық іске қосылып, мектепке дейінгі ұйымдарға арнайы қолжетімділік берілді. Ал Мойынқұм, Талас және Шу аудандарында бұл бағыттағы жұмыстар жалғасуда.
Жаңа жүйе балаларды балабақшамен қамтуда ғана емес, сондай-ақ қаржыландыру үдерісінің ашықтығын қамтамасыз етуде маңызды рөл атқарады. Ваучерлік жүйенің негізгі тиімді жақтары:
- Балабақша кезегінде тұрған балаларға орын табуды жеңілдетеді.
- Балабақшаға нақты қабылданған балалардың есебін жүргізеді.
- Жан басына шаққандағы қаржыландырудың ашық әрі әділ бөлінуіне кепілдік береді.
Мектепке дейінгі ұйымдардағы процестерді оңтайландыру мақсатында «INDIGO» ақпараттық жүйесі енгізілуде. Бұл платформа ата-аналарға балаларын балабақшаға тіркеу және олардың кезегін қадағалауға мүмкіндік береді. Сондай-ақ, әлеуметтік желілер мен интернет-ресурстар арқылы жүйені түсіндіру жұмыстары кеңінен жүргізілуде. Ата-аналар «INDIGO» жүйесіне қатысты мәліметтерді арнайы сайттан (https://indigo-taraz.e-orda.kz/) алуға мүмкіндік алады.
Жамбыл облысында мектепке дейінгі ұйымдарды дамыту жұмыстары жүйелі түрде жалғасуда. Ваучерлік қаржыландыру жүйесі ата-аналар мен ұйымдар арасындағы сенімділікті арттырып, балаларды сапалы біліммен қамтуда жаңа мүмкіндіктер ашады. Бұл бастама облыстың әрбір баласына мектепке дейінгі сапалы білім алуға жағдай жасайтын маңызды қадам болмақ.
