Жуалы ауданының Мыңбұлақ ауылдық округіне қарасты Көлбастау ауылында «Ауыл – ел бесігі» бағдарламасы аясында 149 орындық жаңа мәдениет үйі ел игілігіне берілді.
Аудан бойынша мәдениет саласын дамытуға ерекше көңіл бөлініп келеді. Соның жарқын көрінісі – көптен күткен осы мәдениет үйінің салынуы. Көлбастау тұрғындарының қуанышын еселеген жаңа нысан өнерге талаптанған жастардың шеберлігін шыңдап, ауылдың рухани өміріне тың серпін беретін болады. Нысанның мердігері – «Bek Stroy 2010» ЖШС.
Жаңа мәдениет ошағында барлық қажетті жағдай жасалған: заманауи көрермен залы, кітапхана, түрлі үйірмелерге арналған кабинеттер және өзге де бөлмелер жұмысқа дайын.
Бүгінде ауданда 48 мәдениет нысаны мен 5 «халықтық» атағы бар шығармашылық ұжым тұрғындарға қызмет көрсетіп келеді. Халық сұранысына сәйкес алдағы уақытта Теріс және Кәріқорған ауылдарында 149 орындық мәдениет үйлерінің құрылысы басталып, Шақпақата ауылындағы мәдениет үйі қайта жаңғыртылады. Сондай-ақ Күреңбел және Бәйтерек ауылдарындағы мәдениет үйлерін күрделі жөндеу жоспарланған.
Ауыл жастарының бос уақытын тиімді өткізуіне жағдай жасау мақсатында аудан бойынша мәдениет үйлерінде 90 үйірме жұмыс істеп, 853 жас талантты қамтып отыр.
