«Қауіпсіз қала»: Жылыту маусымы қарсаңында Таразда тұрғын үйлердегі қауіптің алдын алу жұмыстары жүргізілді
Жылыту маусымы басталар алдында пештер мен мұржалардың қауіпсіздігіне ерекше мән беру қажет. Осыған байланысты Таразда тұрмыстық өрттердің және көмірқышқыл газынан уланудың алдын алуға бағытталған «Қауіпсіз қала» акциясы өтті. Шара аясында тұрғын үйлердің қауіпсіздігіне қатысты профилактикалық жұмыстар жүргізіліп, 15 үйдің мұржасы тазаланып, түтін мен көмірқышқыл газын анықтайтын датчиктер орнатылды.
Акцияны Тараз қаласы Төтенше жағдайлар басқармасы мен «Әділет» партиясы Жастар қанатының «Жастар рухы» бірлесіп ұйымдастырды. Профилактикалық жұмыстарға төтенше жағдайлар саласының мамандарымен қатар, Тараз қаласы электр станциясының қызметкерлері, «ҚазТрансГаз Аймақ» өкілдері және жергілікті атқарушы орган қызметкерлері қатысты.
Мамандар «Шөлдала» алабы мен «Восход» саяжайындағы тұрғын үйлерді аралап, қауіпсіздік жағдайын тексерді. Нәтижесінде 15 үйдің мұржасы тазаланып, тұрғындардың үйлеріне түтін мен көмірқышқыл газын анықтайтын арнайы датчиктер орнатылды.
Бұл жұмыстардың мақсаты тек қауіпсіздік талаптарын түсіндірумен шектелмей, жылыту маусымында туындауы мүмкін тәуекелдердің алдын алу болды. Тұрғындарға пештерді пайдалану, мұржаларды тазалау, жылыту жүйелерін тексеру және ақау анықталған жағдайда оны уақытылы жою жөнінде түсіндіру жұмыстары жүргізілді.
«Қауіпсіздік мәселесінде алдын алу жұмыстарының маңызы зор. Әсіресе жылыту маусымы басталар алдында тұрғындарға қауіпсіздік талаптарын түсіндіріп қана қоймай, үйлердегі нақты тәуекелдердің алдын алу қажет. Бүгінгі акция барысында мұржаларды тазалап, түтін мен көмірқышқыл газын анықтайтын датчиктер орнаттық. Бұл тұрғындардың қауіпсіздігін арттыруға бағытталған нақты шаралар. Осындай жұмыстарға жастардың да белсенді араласуы қоғамдағы жауапкершілік мәдениетін қалыптастыруға ықпал етеді», – деді «Әділет» партиясы Жамбыл облыстық филиалы «Жастар рухы» Жастар қанаты төрағасының орынбасары Мерей Жолдасбек.
Акция барысында тұрғындар өздерін толғандырған сұрақтарын қойып, мамандардан жылыту маусымындағы қауіпсіздік талаптары бойынша кеңес алды. Бірлескен профилактикалық жұмыстар алдағы уақытта да жалғасып, тұрғындарға қауіптің алдын алу бойынша түсіндіру жұмыстары жүргізіледі.
«Әділет» партиясы Жамбыл облыстық филиалының баспасөз қызметі
