Жамбыл облысында Халықаралық мүгедектігі бар адамдар күніне орай «Әділет» партиясының «Жүректен жүрекке» қайырымдылық акциясы аясында әлеуметтік қолдау шаралары ұйымдастырылуда. Облыстың бірнеше ауданын қамтыған бастама азаматтардың қажеттіліктеріне назар аударуға, олардың мәселелерін тыңдауға және күнделікті өміріне қолдау көрсетуге бағытталған.
Байзақ ауданында акция нақты көмек көрсетуге арналды. «Қамқор қоғам: кедергісіз орта және тең мүмкіндік» тақырыбымен өткен шара барысында мүгедектігі бар азаматтарға шаштараз, стоматологиялық клиника және фитнес орталығының қызметтерін тегін пайдалану мүмкіндігі берілді.
Акция аясында Ақылбек Берікбаевтың тісін емдету мәселесіне де назар аударылды. Партия өкілдерінің қолдау көрсетуге ықпал етуінің арқасында оның өтініші ескерілді.
«Менің мәселеме бейжай қарамай, тісімді емдетуге көмектескені үшін “Әділет” партиясының өкілдеріне алғысымды білдіремін. Адамның өтінішін тыңдап, қолдау көрсетуі – үлкен жанашырлықтың белгісі. Осындай көмектің арқасында өзіңді қоғамның назарынан тыс қалмаған адам ретінде сезінесің», – деді Ақылбек Берікбаев.
Жамбыл ауданында қайырымдылық көмегі әлеуметтік қолдауды қажет ететін азаматтарға қажетті азық-түлік өнімдерін жеткізу арқылы көрсетілді. «Әділет» партиясы Әйелдер қанатының қатысуымен өткен бастама қамқорлықты нақты іспен көрсетудің үлгісіне айналды.
«Біздің басты мақсатымыз – әр адамның жүрегіне жылу ұялатып, қамқорлық пен қолдауды сезіндіру. Кейде қарапайым көмектің өзі адамға үлкен демеу болады. Біз үшін әр азаматтың жағдайына назар аудару, оның мұң-мұқтажын есту және қолдан келгенше қолдау көрсету маңызды. Өйткені мейірімділік – сөзбен емес, іспен дәлелденетін құндылық», – деді «Әділет» партиясы Әйелдер қанатының Жамбыл аудандық филиалының төрайымы Дамира Болатқызы.
Талас ауданында акция ерекше балаларға қуаныш сыйлауға бағытталды. Балалар ойын-сауық орталығына барып, бірге уақыт өткізіп, ойындарға қатысып, көтеріңкі көңіл күйге бөленді. Ұйымдастырылған акция олардың күнделікті ортасын өзгертіп, балалық шақтың қуанышты сәттерін сезінуіне мүмкіндік берді.
Қордай ауданында мүгедектігі бар азаматтармен кездесу өткізіліп, олардың өтініштері мен ұсыныстары тыңдалды. Партия өкілдері тұрғындарды толғандырған мәселелерді талқылап, әлеуметтік қолдау мен күнделікті кездесетін кедергілерге қатысты пікір алмасты. Кездесу азаматтардың талап-тілектерін тікелей тыңдап, өзекті мәселелерді шешу жолдарын қарастыруға арналды.
Меркі ауданында «Кедергісіз орта» тақырыбында оңалту орталығы мен «JSM DEMEU» орталығында кездесулер өтті. «Әділет» партиясы Меркі аудандық филиалының төрағасы Күләйім Жексембіқызы орталық мамандары және мүгедектігі бар азаматтармен жүздесіп, олардың құқықтары, әлеуметтік қолдау және қолжетімді орта қалыптастыру мәселелерін талқылады.
Әр аудандағы іс-шаралардың форматы әртүрлі болғанымен, олардың түпкі мақсаты ортақ: азаматтардың қажеттіліктеріне назар аудару, қолдау көрсету және қоғам өміріне тең дәрежеде қатысуына жағдай жасау.
Кедергісіз орта – тек физикалық қолжетімділік емес. Ол – адамның пікірін тыңдау, таңдау құқығын құрметтеу, қажетті сәтте көмек қолын созу және ешкімнің қоғамнан шет қалмауына мүмкіндік беру. Ал балалардың күлкісі, тұрғындардың алғысы мен еленген өтініштер – қамқорлықтың адам өміріндегі маңызын айқындайтын қарапайым, бірақ мәні зор көріністер.
«Жүректен жүрекке» акциясы аясындағы жұмыстар Жамбыл облысында жалғасуда. Бастама мейірімділік пен өзара қолдау мәдениетін нығайтып, әр адамға құрметпен қарайтын, тең мүмкіндікке негізделген қоғам қалыптастыруға бағытталған.
«Әділет» партиясы Жамбыл облыстық филиалының баспасөз қызметі
