65 жыл такси қызметін көрсетіп келген 83 жастағы қария бірде бір рет жол ережесін бұзбаған

ҚАРАҒАНДЫ. KAZINFORM — Қарағанды облысының Қарқаралы ауданында 83 жастағы таксист ақсақал тұрады. Тілеуқор Қанапияұлының көзі 100 пайыз көреді. Жолдағы шұрық тесікті алыстан аңғарады. Такси қызметін көрсеткен 65 жылда бірде бір рет жол ережесін бұзып көрмепті.

Фото: Тілеуқор Қанапияұлының жеке архивінен
Қарқаралы аумағында Тілеуқор атаны танымайтын адам кемде кем. Көлігінің іші жылы, жолаушы үшін жайлы. Қажет десеңіз жанды дауыста ән де шырқап береді.

«Егер мен үйде отырсам, ауырып қаламын. Кейін көлігіме барып, рөлге отырғанда бірден энергия мен көңіл-күй пайда болады. Маған осылай жеңіл. Балаларым осы күнге дейін жолда жүріп келдің, енді демал деп айтады. Бірақ бұл ісімді қалдыра алмаймын»,- дейді Тілеуқор Қанапияұлы.

Фото: Тілеуқор Қанапияұлының жеке архивінен
Оның күн тәртібі тығыз. Қарқаралы қаласы мен Нұркен ауылы арасында күнде жүреді. Қажет болса, Қарағанды, Ұлытау облыстары бойынша жолаушыны діттеген жеріне жеткізеді.

«Өте сенімді көлік. Қайда барсам да Тілеуқор атаны шақыртамын. Себебі, ешқашан жолда қалдырып көрген жоқ. Көлігі күйлі. Жол бойы әңгімелесіп, тарихты айтып, ауылдың проблемаларын да қозғап қоямыз», — дейді ауыл тұрғыны Қайдар Төлеутаев.

Фото: Тілеуқор Қанапияұлының жее архивінен
Көлікті алғаш 18 жасында тізгіндеген. Содан бері 65 жыл бойы таксист болып еңбек етіп келеді. Осы кәсіптің арқасында отбасын асырады, балаларын оқытып, үйлендірді.

«Осылай такси жүргізіп жүріп, ақша жинап 9 көлік сатып алдым. Өзіме және балаларыма бір-бірден көлік мінгіздім. Бұл менің осы жұмысымның арқасында. Ұлыма пәтер сатып алу үшін 5 мың доллар жинап бердім. Менің жұмысымда ең бастысы – қауіпсіздік. Егер адам ұйықтамаса, бұл апатқа әкелуі мүмкін. Егер жол ережелерін сақтап жүрсең, ешқандай қиындыққа тап болмайсың. Мен мұның тірі мысалымын», — дейді Тілеукөр Қанапияұлы.

Тілеуқор атаның көлігінің жағдайы үнемі бақылауында. Ақау табылып жатса лезде жөндеп алады. Ол жол ережесін бұзып көрмеген таксист. Жолға шықпас бұрын 8 сағат тынығып алады. Бұл оның басты принципі. Қария жаяу жүруді дағдыға айналдырған. Қақаған аяздың өзінде таза ауада 3 шақырым жүреді. Бұл көбінесе таксистерге пайдалы, дейді зейнеткер. Таңғы жаттығу да күн тәртібінен түспейді.

Фото: Тілеуқор Қанапияұлының жеке архивінен
«Егер күнделікті жаттығу жасамасам, осы 83 жасымда осындай тың болып жүрмес едім. Бос уақытым бола қалса, жаттығу жасаймын. Күнде таңертең және кешке уақытымды спортқа арнаймын. Тау жаққа барып жүріп келетінім де бар. Такси жүргізушілерін салауатты өмір салтын ұстануға шақырамын», — дейді Тілеуқор Қанапияұлы.

Қарияның батаның қолма қол суырып шығаратын ерекше таланты да бар. Әр сөзін ынтымақ, береке жақсылыққа бағыттайды. Тілеуқор Қанапияұлы 8 бала тәрбиелеп, өсірген. 32 немере мен 23 шөберенің атасы. Қазір Ақошқы бөлімшесінеде тұратын шөберелерін Нұркен ауылындағы мектепке тасымалдап, алаңсыз білім алуына жағдай жасап жүр.

Осыған дейін Түркістанда 74 жастағы қария 45 келілік бөренені көтеріп, дүйім жұртты таңғалдырғаны жайлы жазған едік.

https://kaz.inform.kz/news/65-zhil-taksi-kizmetn-korsetp-kelgen-83-zhastagi-kariya-brde-br-ret-zhol-erezhesn-buzbagan-4c321f/?fbclid=IwY2xjawINWVlleHRuA2FlbQIxMQABHQaNBt5sXBc9uwLuvE4vVF4_n5AYHVK7amAyZIxNKZSZFzB3eCkchmtn_Q_aem_zFOwg40Ssipu5qCrlIojBw

Фото: Тілеуқор Қанапияұлының жеке архивінен