Көлсай көлдері ұлттық паркінде аландарын ерткен ұрғашы ілбіс фототұзаққа түсіп қалған, деп хабарлады turkystan.kz.

Аналық пен оның үш аланын Көлсай көлдері ұлттық паркінің фототұзақтары түсіріп алған.

Ұлттық парктің баспасөз қызметінің хабарлауынша, мұндай үлкен ұрпақ өрбіту ілбіс үшін өте сирек кездеседі, бұл олардың мекендеу ортасының жақсы жағдайда екенін көрсетеді.

«Осы сұлу жыртқыштардың әр қадамы — олардың популяциясын сақтау бойынша жасалып жатқан күш-жігердің жемісті екенін білдіреді. Қар барысы қорғауға алынған, бірақ оның популяциясы браконьерлік пен мекен ету аймағының қысқаруына байланысты әлі де осал. Алайда мұндай көріністер ғалымдар мен ұлттық парктердің үйлесімді жұмысы бұл ерекше жыртқыштарды қорғауға көмектесетініне үміт береді», — делінген жазбада.