Бүгінде мемлекет тарапынан шағын және орта кәсіпкерлікті дамытуға барынша көңіл бөлінуде. Осы орайда бірқатар бағдарламалар мен жобалар қабылданып, жүзеге асып келеді. Соның бірі- «Ауыл Аманаты» жобасы.
Байыпты бастаманың нәтижесінде ауыл-аймақта тұратын ағайын өз істерін ашып, аграрлық бизнеске бет бұруда. Расында да бұл қолдаудың тиімділігі мол. Яғни, мемлекет тарапынан 2,5 пайыздық жеңілдетілген несие беріледі. Оны өтеу мерзіміне де ыңғайлы кесте қарастырылған.
Міне, Түркістан ауылдық округінің тұрғындары да осы мүмкіндікті тиімді пайдаланып, кәсіпкерліктің көкжиегін кеңейте түсуде. Жуырда Әшір Бүркітбаев ауылында нан өнімдерін шығаратын «Ел ырысы» наубайханасының ашылуы-осы сөзіміздің бір дәледі.
Әрине, әрбір іс өздігінен атқарылмайды. Бұл жобаны бастауды ауыл тұрғыны, «Мейірлан» шаруа қожалығының төрағасы Мейрамхан Дүтбаев әбден ойластырып, ауылдасы Азат Бимбетовпен ақылдасты. Бұл ұсынысты Азат аға да ой-толғамынан өткізіп, саралай келе «Азат Б» ауылшаруашылық кооперативін құрды. Сөйтіп екеуі мемлекеттен жеңілдікпен 29 миллион теңге несие алып, округ тұрғындарын нан өнімдерімен қамтамасыз ететін «Ел ырысы» наубайхана цехын бірлесіп ашты. Бұл наубайхана цехын ашуда кәсіпкер жігіттер агроөнеркәсіп саласында ұзақ уақыт бойы еңбек етіп келе жатқан Есенқұл ағамен көп ақылдасты. Есенқұл аға да өзінің өмірлік тәжірибесімен бөлісіп, ақыл-кеңесін айтудан аянып қалған жоқ. Сөйтіп іскер жігіттерге нақты бағыт-бағдар берді.
Осылайша өмірге келген наубайхана 1 мамыр-Қазақстан халқының бірлігі күні салтанатты түрде ашылды. «Бірлігіміз бекем, тірлігіміз көркем болсын!» деген ниетпен наубайханада алғашқы болып пісірілген бөлке нан, күлше нан, тоқаш, шелпек, самса, торт, тағы да басқа түрлі нан өнімдері ақ дастарханға қойылып, аймақтың үлкен қариялары арнайы шақырылды. Мерекелік ақ дастархан үстінде қариялар кәсіпкер жігіттер Азат пен Мейрамханға осы игі бастамалары үшін алғыстарын айтып, ақ баталарын берді. Шағын цех толық жұмыс істей келе 5 адамды жұмыспен қамтымақ.
Қазіргі таңда кішігірім кәсіп ашып, оның жұмысын одан әрі жандандырып, санаулы уақыт ішінде іргелі кәсіпорынға айналдыруға ешқандай кедергі жоқ. Бұл ретте бастысы қаражат емес, білім мен бірлік керек. Осылайша өңірде кәсіптің көзін таба білген тұрғындардың әл-ауқаты жақсарып, ауданымыздың экономикасы арта түспек.
Жанысбек Байысбекұлы,
Түркістан ауылдық округі
