https://turkystan.kz/article/261900-qulsaryda-8-zastagy-qyzdy-oltirdi-degen-kudikpen-36-zastagy-azamat-ustaldy
Атырау облысында 5 маусым күні жоғалған 8 жасар қыздың денесі табылды. Бұл ақпаратты облыстық полиция департаментінің баспасөз қызметі растады, деп хабарлайды turkystan.kz.
Бүлдіршін шамамен түскі уақытта үйінен шыққан. Кешкі 21:28-де оның ата-анасы полицияға жүгінген.
«Жедел-іздестіру шараларының нәтижесінде, 6 маусым күні 02:19 шамасында баланың денесі Курсай каналының маңынан тірі емес күйде табылды», – делінген хабарламада.
Мессенджерлер мен әлеуметтік желілерде қылмысқа қатысы бар деп күдіктелген ер адамның суреті мен бейнемазмұны тарады. Видеода белгісіз бір адам баланы қамысқа қарай алып бара жатқанын көрсетеді. Полиция күдіктіні ұстағанын растады.
«Кісі өлтірді деген күдікпен 36 жастағы қала тұрғыны дереу ұсталды. Ол уақытша ұстау изоляторына қамалды, сот оның қамауға алынуына санкция берді. Қылмыстық іс қозғалды», – деп хабарлады ведомство.
Полиция өкілдері бұл қылмыс үшін ең қатаң жазаның қарастырылғанын және тергеу барысы облыстық полиция департаментінің басшысы тарапынан бақылауда екенін атап өтті.
