Тағылымы мол іс-шараға ауданның 12 ауылдық округінен келген батагөй қариялар қатысып, қазақы дәстүрдің мәйегі саналатын ақ батаның мәні мен маңызын насихаттады. Көпшілік алдында елдік пен бірлікке үндеген өнегелі баталар айтылып, ұлттық салт-дәстүрге қатысты сұрақтар бойынша сынға түсті. Байқау барысында ақсақалдардың сөз саптауы, бата беру мәнері мен ұлттық мұраға деген танымы сараланды.
Жарыс қорытындысы бойынша І орынды Қызылқайнар ауылдық округінің ақсақалы Бегалы Сқақов иеленді. ІІ орын Гродиково ауылдық округінің ақсақалы Қожамқұл Алдабергеновке бұйырса, ІІІ орынды Айшабибі ауылдық округінің ақсақалы Есенбек Мамырбек еншіледі. Жеңімпаздарға бағалы сыйлықтар табысталып, қалған қатысушылар түрлі номинациялар бойынша марапатталды.
Махпал Досымбекова, Жамбыл ауданы әкімінің орынбасары
