видеодан скриншот
Кішкентай Темір көптен бері велосипед мінуді армандап жүрген. Ата-анасы баласының тілегін ерекше тәсілмен орындап, жаңа велосипедті оның үйге қайтатын жолына қалдырған. Балақайдың сыйлықты алғаш көрген сәттегі шынайы реакциясы әлеуметтік желі қолданушыларының жүрегін елжіретті, деп хабарлайды turkystan.kz.
Ата-анасы велосипедтің Темірге арналғанын бірден айтпаған. Жол бойында тұрған екі дөңгелекті көлікті байқаған бала оған қызыға қарағанымен, өзгенің заты деп ойлап, жақындауға батпаған.
Үлкендер рұқсат бергеннен кейін ғана ол велосипедке аз уақыт отырып көрген. Кейін ата-анасы көптен күткен сыйлықтың өзіне арналғанын айтқан кезде Темір қуанышын жасыра алмай, оларға бірден алғыс білдірген.
Баланың анасы Анастасия Сүлейменова осы әсерлі сәтті видеоға түсіріп алған. Бейнеролик әлеуметтік желіде жылдам тарап, көпшіліктің ыстық ықыласына бөленді.
Желі қолданушылары Темірдің шынайы қуанышымен қатар, оның тәрбиесіне де назар аударған. Көпшілік баланың бөтен адамның мүлкі деп ойлаған велосипедті рұқсатсыз ұстамағанын ерекше атап өтті.
Пікір қалдырушылар ата-анасын ұлының бойына өзгенің затын құрметтеу қасиетін сіңіргені үшін мақтады. Кейбір қолданушылар мұндай жағдайларда балаларға бөтен затты мүлдем қозғамау керектігін үнемі түсіндіріп отыру маңызды екенін жазды.
Бейнеролик әзілсіз де қалмады. Кейбір желі қолданушылары жақын жерде жасырынып тұрған Темірдің әкесін дене бітіміне қарап Танос кейіпкеріне теңеген.
Толық нұсқасына гиперсілтеме беруді ұмытпаңыз: https://turkystan.kz/article/286067-ulynyn-armanyn-oryndagan-ata-ananyn-tosynsyiy-kopsilikti-suisindirdi
