Каспийдегі әскерилердің қазасына қатысты жалған ақпарат таратқан төрт қазақстандық айыппұл арқалады
Каспийдегі қайғылы оқиғаға қатысты жалған ақпарат таратқан төрт қазақстандық жауапкершілікке тартылды.
Полиция Маңғыстау облысында болған төтенше жағдайға қатысты жалған ақпарат таратудың бірнеше дерегін анықтаған.
Әлеуметтік желілерде әскери қызметкердің құтқарылғаны, оқиғаның мән-жайы жасырылып жатқаны және басқа да әскери қызметкерлердің қаза болғаны туралы ақпарат тараған. Қорғаныс министрлігі бұл мәліметтерді ресми түрде жоққа шығарды.
Полиция осы секілді жазбалардың төрт авторын анықтаған. Екі әйел әскери қызметкер А.А. туралы расталмаған ақпарат жариялаған.
“Д.С және Г.С есімді азаматтардың Facebook әлеуметтік желісіндегі парақшаларына әскери қызметкер А.А. туралы ақпарат жариялағаны белгілі болды. Жарияланымдарда оның суға батып бара жатқан жолдасын құтқарып, өз бетімен жағаға шыққаны, сондай-ақ оның ерлігі мен құтқарылу жағдайлары қасақана жасырылып отырғаны туралы мәліметтер таратылған. Қорғаныс министрлігінің ақпаратына сәйкес, А.А оқу-жаттығу барысында жағалауда болып, оқу-жаттығу жоспарына сәйкес көзделген міндеттерді орындаған. Тараған мәліметтер шындыққа сәйкес келмейді”, – делінген полиция хабарламасында.
Ал , Шымкент пен Көкшетау қаласының тағы екі тұрғыны қаза болған кейбір әскери қызметкерлер туралы деректердің жасырылып отырғаны туралы ақпарат таратқан.
Сот төрт адамды да әкімшілік жауапкершілікке тартты. Олардың әрқайсысына 20 АЕК (86 500 теңге) мөлшерінде айыппұл салынды.
Еске салсақ, бұған дейін аза тұту күні TikTok-та тікелей эфирге шығып, билеген блогер 10 тәулікке қамалғаны туралы жазған едік.
