«Қазақтелеком» қызметіне шағым көбейді: қазақстандықтардың тариф пен интернет сапасына көңілі толмайды
Мәселен, бір қолданушы интернет істен шыққаннан кейін компанияның байланыс орталығына бірнеше рет хабарласқанын айтып, операторға қосыла алмағанына шағымданды.
«Бүгін интернет жоғалып кетті. Қазақтелекомға үш рет қоңырау шалдым. 30 минуттан күтіп, бірінші кезекке жеткенде қоңырауды үзіп жібереді. Мобильді қосымша арқылы жаздым, жауап жоқ. Ұялы телефоннан қоңырау шалсам да, үнсіздік. Не болып жатыр?! Бір сөзбен айтқанда, бұл — мазақ», — деп жазды қолданушы.
Тағы бір қолданушы интернет бағасына қатысты мәселе көтерді. Оның айтуынша, екі айға Wi-Fi үшін 38 мың теңге төлейді.
«Кім қанша төлеп жатыр Wi-Fi-ға? Екі айға 38 мың шығады. Арзан Wi-Fi-лар бар ма? Бөліссеңдер», — деп жазды ол.
Тағы бір жазба авторы компанияның қызмет сапасына қатысты сын айтқан.
«Құрметті «Қазақтелеком», біз интернет қызметі үшін ай сайын 7-8 мың теңге төлейміз. Бірақ сіздердің қызметтеріңіз неге соншалықты нашар жұмыс істейді? Төлем жасағаннан кейін бірнеше күн өткен соң интернет үйдің төбесіне шығып, бұрынғыдай желі ұстап отырғандай жұмыс істейді. Бізде бар болғаны екі телефон және теледидар қосылған. Бағаны көтеруге келгенде сіздер дайынсыздар, ал бір нәрсе жасау, өзгерту керек болғанда сіздерге хабарласу мүмкін емес! Қандай да бір шара қолдануыңызды сұраймыз», — деп жазды тағы бір қолданушы.
Интернет сапасына қатысты тағы бір шағымды @bella.ss23 атты қолданушы жариялаған.
«Қазақтелеком, сіздерге не болды? Неге Wi-Fi мен 4G арқылы фильмді де жүктей алмаймын?» — деп жазды ол.
Ал @qazaq_uaq атты қолданушы мобильді байланыс қызметіне қатысты наразылығын білдірген.
«Осы Қазақтелеком неге алдайды екен? Мобильді байланыстарын қосуға кеңес бермеймін, ол нөмірді аккаунтқа байлауға келмейді», — деп жазды ол.
Тағы бір қолданушы да таңданысын жасырмаған.
«Ай сайын шамамен 10 мың теңге төлеймін, келісімшартты 2028 жылға дейін жасасқанмын. Енді басқа компанияға ауысу немесе Қазақтелекомның арзанырақ тарифіне көшу үшін 17 мың теңге төлеуім керек екенін айтты. Келісімшартта мұндай шарттың не үшін енгізілгенін түсінбеймін. Неліктен тариф ауыстырғаным үшін ақша төлеуім керек? Осындай жағдайға тап болғандар бар ма?» – деп жазды қолданушы.
Провайдерді ауыстыруға кеңес бергендер
Wi-Fi бағасына қатысты жазбаға пікір білдіргендердің кейбірі басқа интернет провайдеріне ауысуға кеңес берген. Өзін компанияның бұрынғы қызметкері ретінде таныстырған қолданушы «Бұрынғы қызметкер ретінде басқаға барыңыз деп кеңес беремін» деп жазса, тағы бір қолданушы да өзін бұрынғы қызметкер ретінде таныстырып, «Мен де сол компанияның бұрынғы қызметкері ретінде басқа провайдерге ауысуға кеңес беремін» деген пікір қалдырған. Ал тағы бір пікір авторы өзін Маңғыстау облыстық телекоммуникация бөлімінің бұрынғы қызметкері ретінде таныстырып, «Мен де Маңғыстау облыстық ОДТ-данмын. Қазір қалай аталатынын да білмеймін. Ол жерден кетіңдер» деп жазды.
Келісімшарт пен тарифке қатысты шағым
Threads қолданушысы aselkabdoldaeva.84 «Қазақтелекомға» қатысты шағымын бес бөлімнен тұратын жазбасында жариялады. Оның айтуынша, компания қызметкері үй интернетін қосу кезінде ай сайынғы құны 12 990 теңге болатын тариф ұсынған. Үйіне роутер орнатылып, келісімшарт жасалған. Қолданушы бұған дейін үйінде Beeline интернеті болғанын айтып, «Қазақтелеком» қызметі ұнамаған жағдайда кейін қайтадан Beeline-ға қосыла алатынын нақты сұрағанын жазды.
«Қызметкер маған «иә, кез келген уақытта қайта қоса аласыз» деп нақты жауап берді. Осы ақпаратқа сеніп, мен «Қазақтелеком» қызметіне келісім бердім. Алайда кейін шарттың 3 жыл мерзімге рәсімделгенін білдім. Сонымен қатар, шартты мерзімінен бұрын бұзған жағдайда тағы 6 000 теңге төлеуім керек екені айтылды», — деп жазды ол.
Қолданушының айтуынша, келісімшарттың үш жылға жасалғанын және мерзімінен бұрын бұзғаны үшін қосымша ақы алынатынын алдын ала білгенде, шешімі өзгеше болуы мүмкін еді.
«Егер мен шарттың 3 жылға жасалғанын және мерзімінен бұрын бұзған жағдайда қосымша 6 000 теңге төлеу керектігін алдын ала білген болсам, бұл қызметке келісер алдында өз шешімімді басқаша қабылдар едім», — деп жазды ол.
Сонымен қатар, қолданушы тариф құнына қатысты да сұрақ қойған. Оның жазуынша, бастапқыда айына 12 990 теңге деп көрсетілгенімен, кейін төлем кезінде 16 112,52 теңге сомасы шыққан.
«Сонымен қатар, бастапқыда маған 12 990 теңге болатын тариф ұсынылғанымен, кейін төлем жасау кезінде 16 112,52 теңге сомасы көрсетілді. Бұдан бөлек, менің келісімімсіз ақылы телеарналар қосылғанын анықтадым. Үйде теледидардың өзі қолданылмаған», — деп жазды ол.
Оның айтуынша, оған «отбасы тарифі» ретінде екі нөмір берілетіні айтылған. Кейін қосымша үшінші нөмірдің де қосылғанын анықтаған.
«Бұл нөмірді қосуға да мен келісім берген жоқпын», — деп жазды қолданушы.
Ол осы мәселелер бойынша компанияға барып, арыз жазғанын және жағдайды реттеуді сұрағанын, алайда өтінішіне нақты жауап берілмегенін мәлімдеді.
Осылайша, Threads желісіндегі жазбаларда қолданушылар интернеттің тұрақсыздығы, Wi-Fi және 4G жылдамдығы, байланыс орталығына хабарласу қиындығы, тариф бағасы, келісімшарт мерзімі, қосымша төлемдер, мобильді байланыс және абоненттің келісімінсіз қосылған қызметтерге қатысты наразылықтарын жазып жатыр.
фото: әлеуметтік желіден
