Су ресурстары және ирригация министрлігі Үлкен Алматы каналының 125 шақырымнан астам бөлігін бетондау бойынша үш кезеңнен тұратын жоба әзірлеп жатыр
Су ресурстары және ирригация министрі Нұржан Нұржігітов Алматы облысы Еңбекшіқазақ ауданына жұмыс сапарымен барып, Д. Қонаев атындағы Үлкен Алматы каналының учаскелерін реконструкциялау жұмыстарының нәтижесімен танысты.
Айта кетейік, биыл каналдың жалпы ұзындығы 1,53 шақырым болатын апатты учаскелерін реконструкциялау жұмыстары аяқталды. Су шығынын азайту және 33,3 мың га жерді сапалы суаруды қамтамасыз ету мақсатында арнаны монолитті темірбетонмен қаптау жұмыстары жүргізілді.
Жоба нәтижелерімен танысқан Нұржан Нұржігітов министрліктің Су шаруашылығы комитетіне нысанды пайдалануға түпкілікті қабылдамас бұрын мұқият тексеруді тапсырды.
«Келесі жылдың вегетация кезеңіне дейін каналдың толық дайын болуын қамтамасыз ету қажет. Ауыл шаруашылығы тауарын өндірушілерге су жеткізуде ешқандай мәселе болмауы керек. Сонымен қатар Үлкен Алматы каналының басқа учаскелерін реконструкциялауға қажетті құжаттарды әзірлеу жұмыстарын уақытылы аяқтау қажет», – деді су шаруашылығы ведомствосының басшысы.Еске сала кетейік, Су ресурстары және ирригация министрлігі Үлкен Алматы каналын үш кезеңмен реконструкциялауды жоспарлап отыр. Қазіргі уақытта ұзындығы 15,6 шақырым болатын учаскені бетондау жобасы әзірленді.
Сонымен қатар жалпы ұзындығы 110 шақырым болатын басқа учаскелерді реконструкциялауға қажетті құжаттар әзірленіп жатыр. Жұмыстың үшінші кезеңінде Үлкен Алматы каналының бас су құрылысы жөнделеді.
Каналды реконструкциялау оның өткізу қуатын жобалық көрсеткішке дейін жеткізуге және Алматы облысының суармалы жерлеріне су беруді жақсартуға мүмкіндік береді.
