https://turkystan.kz/article/262215-amanat-taza-tabigat-urpaqqa-amanat
Экологиялық мәдениетті қалыптастыру мен қоршаған ортаны қорғау – Мемлекет басшысы Қасым-Жомарт Тоқаевтың саяси ұстанымындағы маңызды басымдықтардың бірі. Президент ұсынған «Таза Қазақстан» бастамасы бүгінде бүкіл ел аумағында кең қолдауға ие болып, тұрақты әрі ауқымды экологиялық акцияларға ұласты. Осы бағытта еліміздің барлық өңірінде «AMANAT» партиясының бастамасымен өткізілетін «Таза бейсенбі» экологиялық акциясы тұрғындардың табиғатқа жанашырлығын арттырып, қоғамдық жауапкершілікті нығайтып келеді.
Алматы қаласы Жетісу ауданында өткен «Таза бейсенбі» экологиялық акциясы аясында Қазыбаев көшесі бойында пластик және тұрмыстық қалдықтар жиналды. Белсенділер мен студенттердің қатысуымен өткен іс-шарада 20-дан аса қап қоқыс шығарылды.
Шымкент қаласының Тұран ауданында «AMANAT» партиясының қалалық филиалы ұйымдастырған тазалық жұмыстарына 30-ға жуық белсенді қатысып, көпқабатты үйлердің аулаларын қоқыстан тазартты. Ардагерлер мен жастар бірлесіп, шөп шауып, бұтақ кесіп, тұрғындарға қолайлы орта қалыптастырды.
«Біз өткеннің тәжірибесін ұмытпауымыз керек. Табиғатты аялау — бұл тек сенбілікпен шектелмейді, бұл — күнделікті әдетке айналуға тиіс жауапкершілік. Осындай шараларға жастардың қатысуы көңіл қуантады. Өйткені таза қоғам — саналы ұрпақтың қолында», – деп атап өтті Ардагерлер кеңесінің төрағасы Әділбек Сатыбалды.
Жамбыл облысында да бұл бағыттағы жұмыс жүйелі жүргізілуде. Байзақ ауданында ұйымдастырылған «Таза бейсенбі» акциясы барысында «Байзақ баба» кесенесі маңында тазалық жұмыстары жүргізілді.
«Әрбір азамат өз айналасын таза ұстауға жауапты екенін ұмытпауы керек. Бұл – тек санитарлық тәртіп емес, туған жерге, тарихи мұраға деген құрметтің көрінісі. Табиғат пен тарих – ұлттың аманаты», – деді «Мәдениет» бастауыш партия ұйымының төрағасы Сәкен Сыздықов.
Жетісу облысы, Ескелді ауданында соңғы жылдары экологиялық тәрбие мен қоршаған ортаны қорғауға бағытталған игі істер қарқын алып келеді. Кезекті экоакция бұл жолы Көкжазық ауылдық округіндегі табиғаты көз тартар Бүлдіршін бұлағының маңында өтті. Іс-шараға 50-ге жуық адам қатысты. Бірлесе атқарылған жұмыстың нәтижесінде 5 тоннадан астам тұрмыстық қалдық жиналып, арнайы полигонға жеткізілді.
Қостанай облысы Сарыкөл ауданында экоакциясы аясында қоғамдық кеңістіктер тазартылып, ойын алаңдары сырланып, абаттандыру жұмыстары жүргізілді.
Қызылорда облысы Сырдария ауданында өткен игі іске партия мүшелері мен бастауыш ұйым белсенділері қатысып, Қалғандария, Әйтек және Майжарма каналдарының аумағы тазаланды.
«Ауылына қарап, азаматын таны» дегендей, әр елді мекеннің тазалығы, сәулетті көркі тұрғындардың жанашырлығына байланысты. Тазалық біз үшін басты құндылық», – деді партияның аудандық филиалының атқарушы хатшысы Ақтөре Ибрагимұлы.
Солтүстік Қазақстан облысының Пресновка ауылында «Таза бейсенбі» акциясы Сәбит Мұқановтың 125 жылдық мерейтойына орай ұйымдастырылып, ауылдың көшелері абаттандырылды.
«Сәбит Мұқановтың есімі – тек ауданымыздың ғана емес, бүкіл қазақ елінің мақтанышы. Мұндай акциялар тек табиғатты қорғау шарасы ғана емес, сонымен бірге тарихи мұрамызға деген құрметтің айғағы», – дейді партияның Жамбыл аудандық филиалының атқарушы хатшысы Владимир Волков.
Экологиялық мәдениетті қалыптастыру мен табиғатты қорғауға бағытталған акция Түркістан облысында да жалғасын тапты. Тазалық жұмыстары аудан аумағындағы көрікті орындардың бірі — Біркөлік шатқалында өтті. Бүгінде аталған шатқал аумағында 300-ге жуық демалыс орны жұмыс істеп тұр. Алайда мұнда келушілердің бейқамдығынан табиғи ландшафт ластанып, қоршаған ортаға зиян келуде. Өз кезегінде акцияға қатысушылар табиғи аймақтың тазалығын қалпына келтіру мақсатында бірқатар жұмыс атқарды.
Қарағанды облысы Жаңаарқа ауданында «Жастар» және «Мәңгілік Ел» алаңдарында өткізілген тазалық жұмыстары барысында 20 қап қоқыс шығарылып, тұрғындарға экологиялық тәртіп туралы түсіндіру жүргізілді.
«Таза Қазақстан» акциясы бастау алғалы тұрғындар мәдениеті де өзгерді. Бұрынғыдай көп қоқыс жоқ қазір. Таза тұрған жеріңе қоқыс шашуға да ұяласың ғой», – дейді партия қызметкері Гаухар Иманбаева.
Айта кетейік, 2025 жылдың алғашқы бес айында бұл акция ел аумағында 22 рет ұйымдастырылып, еліміздің барлық өңірлерінде өтті. 600-ден астам ластанған аумақ – саябақтар, скверлер, өзен-көл жағалаулары, Ұлы Отан соғысы батырларына арналған ескерткіштер, тарихи-мәдени маңызы бар нысандар тазартылды. 14 мыңға жуық адам атсалысып, 2000 тоннадан астам қоқыс жиналып, қайта өңдеуге жіберілді.
