«Анаға тағзым» отбасын қолдау орталығында 12-16 мамыр – Репродуктивті денсаулық апталығы және Аналар күніне орай «Қамқор қоғам» Ашық есік күні ұйымдастырылды.
Айта кетейік, аталған шара қоғамдағы ана мен бала денсаулығына назар аудару, әлеуметтік осал топтарға көмек көрсету, отбасы құндылықтарын дәріптеу және азаматтардың құқықтық, психологиялық, медициналық сауатын арттыруды мақсат етті.
Іс-шараға қала тұрғындары, аналар мен бойжеткендер, әлеуметтік қызметкерлер, құқық қорғау органдары мен денсаулық сақтау саласының мамандары, ғалымдар, психологтар, сондай-ақ өңірлік ҚХА Аналар кеңесінің өкілдері де қатысты.
Маңызды жиында «Анаға тағзым» отбасын қолдау орталығының директоры, өңірлік ҚХА Аналар кеңесінің төрайымы Эльмира Мырза-Ғали және Жамбыл облысы Әділет департаменті басшысының орынбасары Ермек Қорабаев сөз алып, қоғамдағы отбасылық құндылықтарды нығайтудың, әлеуметтік әріптестікті дамытудың және азаматтарға көрсетілетін жан-жақты қолдаудың маңыздылығын атап өтті.
Ашық есік күні аясында заңгер кеңесі, психологиялық қолдау, әлеуметтік көмек және дәрігер алаңы жұмыс істеп, келушілер психолог, заңгер, банк қызметкерлері және гинеколог мамандарымен тілдесіп, тегін кеңес алды.
Профилиактикалық шара барысында қыз-келіншектерге белгілі акушер-гинеколог, медицина саласының үздігі, «Бүгінгі бойжеткен – ертеңгі асыл жар, аяулы ана» кітабының авторы Ақерке Тоқбергенова репродуктивті денсаулық туралы пайдалы ақпараттар ұсынып, бірқатар кеңестерін айтты. Жиын соңында Аналар күніне орай ұйымдастырылған «Анамның қолы» атты фотожоба аясында ұйымдастырылған шығармашылық байқау қорытындыланып, үздіктерге алғыс хаттар табысталды.
«Қамқор қоғам» Ашық есік күні бұл тек бір күндік іс-шара емес, қоғамдағы аналар мен отбасы мүшелеріне жан-жақты қолдау көрсетуге бағытталған жүйелі жұмыстың бір көрінісі. Ұйымдастырушылар мұндай іс-шаралар алдағы уақытта да тұрақты түрде жалғасын табатынын жеткізді.
