Тамды ауылы талай дарынды азаматтарды түлеткен киелі мекен. Солардың бірі, аудан спортының дамуына өлшеусіз үлес қосқан, шәкірт тәрбиелеуде табандылық пен талапты ту еткен ардақты ұстаз – Бауыржан Сарыұлы Бекұзақов.
Бауыржан Сарыұлы 1963 жылдың 11 ақпанында Тамды ауылында дүниеге келген. Қарапайым ауыл баласының спортқа деген қызығушылығы оны үлкен өмір жолына жетеледі. 1980 жылы «Аса» мектеп-интернатын тәмамдаған соң, 1980-1984 жылдары Қазақ мемлекеттік дене шынықтыру институтында «Дене шынықтыру және спорт» мамандығы бойынша білім алып, самбо күресінен оқытушы-жаттықтырушы біліктілігін иеленді. Еңбек жолын 1984 жылы Үшарал орта мектебінде дене шынықтыру пәнінің мұғалімі болып бастаған ол кейін Ақкөл спорт мектебінде, Тамды орта мектебінде ұстаздық етті. 1995 жылы Қазақ политехникалық институты Қаратау филиалында дене шынықтыру пәнінің оқытушысы болды. 1999-2008 жылдары Қойгелді атындағы орта мектепте, 2008-2013 жылдары Талас ауданы балалар-жасөспірімдер спорт мектебінде жаттықтырушы қызметін атқарды. 2013-2025 жылдары қайтадан Қойгелді орта мектебінде еңбек етіп, жүздеген шәкіртке тәлім берді. Бүгінде Тамды ауылдық спорт кешенінің меңгерушісі ретінде ауыл спортының дамуына жаңа серпін беріп келеді.
Чемпиондар шеберханасы
Бауыржан Сарыұлының бапкерлік жолы – жеңіске толы жол. Ол жаттықтырған шәкірттер Қазақстан, Азия және әлем ареналарында топ жарып, ел мерейін үстем етіп жүр. Атап айтар болсақ, самбо күресінен жасөспірімдер арасында әлем және Азия чемпионы атанған, ересектер арасында әлем чемпионатының күміс жүлдегері, халықаралық дәрежедегі спорт шебері Дидар Молдағалиев, қазақ күресі мен самбодан Қазақстан республикасының бірнеше дүркін чемпионы, Азия чемпионы Данияр Молдағалиев, Азия чемпионатының жүлдегері Әлфараби Рахымберді. Ұстаз тәрбиелеп, үлкен додаларға үкілеп қосқан чемпиондар қатарын қазақ күресінен Республика бойынша жеңімпаздар Нариман Айтенов, Рүстем Қожақметов, Мақсат Берібаев, Амангелді Тойбаев, дзюдо мен самбодан Республикалық жарыстардың жеңімпаздары Дәурен Қуатов, Ерболат Есеналиев, Нұрсұлтан Шадманов толықтырып тұр. Ал, қазақ күресінен жастар және ересектер арасындағы Қазақстан чемпионы, «Үздіктердің үздігі» турнирінің жеңімпазы Айдар Бескемпір жаттықтырушы еңбегінің жарқын жемісі іспеттес. Сонымен қатар, Ануар Дулатбаев, Еркеғали Смайыл, Жалғас Сары, Айдын Әбдікадыр және басқа да көптеген шәкірттері Республикалық, Халықаралық додаларда жүлделі орындарға ие болып, Тамды ауылының атын биікке көтерді. Облыстық чемпионаттарда да оның шәкірттері үздік нәтижелер көрсетіп келеді. Бұл – жүйелі еңбектің, табанды дайындықтың және ұстаздың кәсіби шеберлігінің айқын дәлелі.
Ұстаздық миссия
Бауыржан Сарыұлы үшін спорт, шәкірт тәрбиелеу медаль мен марапатқа ие болумен ғана шектелмейді. Жастарды спортқа баулу ол үшін мінез қалыптастыру мектебі, ал спорт- тәртіп пен төзімділіктің алаңы. Шәкірттеріне «жеңіс – еңбектің жемісі» екенін үнемі айтып, үздіксіз ұғындырып келеді. Қарапайымдылық, еңбекқорлық, отансүйгіштік оның басты ұстанымы. Жылдар бойы ауыл балаларына дұрыс бағыт-бағдар беріп, бос уақытын тиімді өткізуіне, салауатты өмір салтын ұстануына ықпал еткен ұстаздың еңбегі орасан. Тамды ауылының тұрғындары мен жастары бүгінде спортты ең алдымен Бауыржан Сарыұлының есімімен байланыстыратындықтары сондықтан болар.
Ауыл спортының дамуына бар ғұмырын арнаған абыройлы азамат – ел мақтанышы. Оның тәрбиесін көрген шәкірттері ұстаз сенімін ақтап, спорт пен өмір жолында биік белестерді бағындырып келеді. Мұндай жандар – ауылдың шамшырағы. Мұндай ұстаз – ұрпақтың бағы.
Бапкердің басты жетістігі шәкірт сенімі. Әр баланың мүмкіндігін танып, қолдау көрсету арқылы олардың өзіне деген сенімін арттыруда аянбай еңбек етіп жүрген Бауыржан Сарыұлы шәкірттерін спорттағы жеңіс пен жеңілістің мәнін түсіндіріп, қандай жағдайда да мойымауға үйретуде.
Нұрай Серікқызы,
М.Х. Дулати атындағы Тараз университетінің 2 -курс студенті.
