Бұл туралы Энергетика министрі Ерлан Ақкенженов CERAWeek халықаралық энергетикалық конференциясында айтты.
АҚШ-тың Техас штатындағы Хьюстон қаласында өтіп жатқан маңызды жиында ведомство басшысы еліміздің мұнай саласының қазіргі жағдайын таныстырып, жаһандық нарықта сенімді энергия жеткізуші ретіндегі ұстанымын жеткізген.Энергетикалық қауіпсіздік, соның ішінде Каспий құбыр консорциумы (КҚК) тұрақты жұмысын қамтамасыз ету мәселелері айтылып, бұл маршруттың үздіксіз жұмыс істеуі ұлттық экономика үшін өте маңызды екеніне ерекше тоқталған.Қазақстан экспорт бағыттарын әртараптандыру саясатын жүйелі түрде жүзеге асыруда, оның ішінде Қытай Халық Республикасына бағытталған маршруттарды дамыту да қарастырылған. Алайда КҚК экономикалық тиімділігі жоғары және басымдық берілетін тасымалдау арнасы болып қала беретінін атап өткен.«Сонымен қатар мұнай-химия саласын дамытуға арналған стратегиялық жоспарлар да көрсетілді. Қазақстан мұнай өңдеу қуатын екі есеге арттыруды жоспарлап отыр, бұл тек ішкі нарықты қамтамасыз етіп қана қоймай, Орталық Азия өңірінде мұнай өнімдерін жеткізуші ретіндегі елдің позициясын нығайтуға мүмкіндік береді», — делінген хабарламада.
