сурет: istockphoto.com
Бір түн ұйықтамаудың қаупі қандай?: 24 наурыз 2026, жаңалықтар Turkystan.kz
Бір түн ұйықтамаудың өзі ағзадағы тәбет пен зат алмасуды бұзып, артық тамақ жеуге итермелеуі мүмкін. Бұл туралы Колумбия университеті зерттеушісі, Каталонияның ашық университеті профессоры Диана Диас Риццоло айтты. Сарапшының пікірін Men’s Health басылымы жариялаған, деп хабарлайды turkystan.kz.
Маманның сөзінше, ұйқының жетіспеуі қандағы глюкоза деңгейін және тәбетті реттейтін гормондарды бұзады. Атап айтқанда, тоқтық сезіміне жауап беретін лептин азайып, ал «аштық гормоны» саналатын грелин керісінше көбейеді.
Нәтижесінде адам өзін бұрынғыдан да аш сезініп, жоғары калориялы тағамдарға, тәтті мен майлы асқа жиі әуестене бастайды.
Дәрігер мұндай өзгерістер бір тәулікке дейін сақталуы мүмкін екенін атап өтті. Бұл жағдай «тұйық шеңберге» әкеледі: ұйқысыздық тәбетті күшейтеді, зиянды тағам ұйқы сапасын нашарлатады, ал нашар ұйқы қайтадан артық тамақ жеуге итермелейді
Сарапшылардың айтуынша, бұл цикл ұзақ уақыт сақталса, салмақ қосу мен метаболикалық бұзылыстарға әкелуі ықтимал.
