Мәжіліс депутаттары Р.С. Кожасбаев, А.Т. Перуашев, А.А. Баккожаев және Е.Н. Мамбетовпен бірге Солтүстік Қазақстан облысына жұмыс сапарымен барып, өңір кәсіпкерлерімен кездестік.
Сапардың негізгі мақсаты — бизнеске көрсетілетін мемлекеттік қолдау шараларының тиімділігін бағалау және олардың жергілікті деңгейде іске асу барысын талқылау болды.
Кездесуге мемлекеттік органдардың өкілдері де қатысты. Атап айтқанда, Индустрия және құрылыс вице-министрі Олжас Серікбаевич Сапарбеков, Қаржы вице-министрі Даулет Маратович Кенбеил, Ауыл шаруашылығы вице-министрі Ербол Амангелдіұлы Тасжүреков және Ұлттық экономика вице-министрі Ернар Еркінғалиевич Сағынаев кәсіпкерлермен бірге талқылауға қатысып, өз бағыттары бойынша түсініктеме берді.
Петропавл қаласында өткен кездесуде бизнес өкілдері қолданыстағы бағдарламаларға қатысты пікірлерін білдіріп, инфрақұрылым, қаржыландыруға қолжетімділік, кадр тапшылығы және мемлекеттік сатып алу салаларындағы өзекті мәселелерін атап өтті. Жаңа өндіріс орындарын аралап, кәсіпкерлердің нақты ұсыныстарын тыңдадық. Бұл мәселелердің барлығы тиісті министрліктер деңгейінде қаралатынын жеткіздік.
Сапар барысында Солтүстік Қазақстан облысының әкімі Ғауез Торсанұлы Нұрмұхамбетов жүздесіп, өңірдегі кәсіпкерлерді мазалаған түйткілдер мен оларды шешу жолдарын талқыладық.
Кездесу қорытындысында депутаттармен бірге бизнеске көрсетілетін қолдау тетіктерін жетілдіру қажет екенін атап өтіп, кәсіпкерлер көтерген мәселелерді орталық мемлекеттік органдарға жеткізетінімізді айттық.
