Фото: «Креативті индустрияларды дамыту қоры
Астанада Creative Aimaq республикалық жобасы аясында өткен Павлодар облысының креативті жәрмеңкесінде еліміздің танымал актері әрі әншісі Қобыланды Болат ерекше концерттік бағдарлама тарту етті, деп хабарлайды turkystan.kz.
27–28 маусым күндері Qazaq Creative Hub алаңында «Креативті индустрияларды дамыту қоры» корпоративтік қоры жүзеге асырып жатқан Creative Aimaq республикалық жобасы аясында Павлодар облысының креативті жәрмеңкесі өтуде.
Әсерлі кеште көрермендер сүйікті әндерін бірге шырқап, ерекше шығармашылық атмосфераға бөленді. Концерт ұлттық рух пен заманауи өнерді ұштастырып, өңірдің мәдени әлеуетін айшықтай түсті. Қобыланды Болаттың өнері көрерменнің ыстық ықыласына бөленіп, кештің шынайы көркемдік шыңына айналды.
«Open Stage Night — шығармашылықты, мәдениетті және талантты тоғыстырған ерекше алаң ретінде елордалықтар мен қала қонақтарына ұмытылмас әсер сыйлады. Бұл кеш Creative Aimaq жобасының өңірлердің шығармашылық әлеуетін танытып қана қоймай, өнер арқылы адамдарды жақындастыратын маңызды мәдени бастама екенін тағы бір мәрте дәлелдеді», делінген хабарламада.
Жәрмеңке бағдарламасы 28 маусым күні де жалғасады. Қазақстанның Еңбек Ері, көрнекті ақын және қоғам қайраткері Олжас Сүлейменовтің «Я знаю!» кітабының ресми таныстырылымы мен «Ертіс пен Есіл арасы» музыкалықпоэзиялық кеші өтеді.
Қонақтарды республикалық «Urshyk» қолөнершілер ұйымының өкілі Гүлназия Жүсіпбаеваның, ұлттық аспап шебері Талант Тежекеновтың, зергер Ольга Ловинаның, «Maison Du Croc» брендінің негізін қалаушы Ярослав Жуляблиннің, «Raastie» шеберханасының жетекшісі Расиля Латыпованың, сондай-ақ «V.Sultan» брендінің негізін қалаушы Виктория Султанованың шеберлік сабақтары күтеді.
Айта кетейік, Creative Aimaq — бұл өңірлердің шығармашылық әлеуетін біріктіретін, ұлттық мәдени мұраны дәріптейтін және отандық креативті индустрияларды жаңа деңгейге көтеретін маңызды республикалық жоба. Павлодар облысының креативті жәрмеңкесі осы мақсаттың жарқын көрінісіне айналып, елордалықтар мен қала қонақтарына ұлттық өнер мен заманауи шығармашылықтың үйлесімін танытты.
Толық нұсқасына гиперсілтеме беруді ұмытпаңыз: https://turkystan.kz/article/283662-creative-aimaq-qobylandy-bolat-elordalyqtarga-erekse-koncert-syilady
