Бүгін аудандық мәдениет үйінде Туған жерінің руханиятына еңбегі сіңген журналист, жүрегі жырға толы ақын- Әлсейіт Әлменнің 80 жылдық мерейтойына орай ақынның шығармашылығын насихаттауға арналған «Естелікке айналған есім» атты әдеби сырласу кеш өтті.
Алдымен келушілер фойеде Әлсейіт Әлменнің өмірбаяны мен шығармашылығына арқау болған «Өмір жолы лентасы» инсталляциясы мен «Әлсейіттің жарық жыр әлемі» кітап көрмесін тамашалады.Шара шымылдығы айтыскер ақын, Талғат Хусайыновтың арнау өлеңімен ашылды. Рухани кешті аудан әкімі аппаратының басшысы Құдайберген Рысдәулет ашып, құттықтау сөз сөйледі:
— Біз бүгін талантты ақын, дарынды журналист, Қазақстан Журналистер одағының мүшесі болған Әлсейіт Шахантегінің дүниеге келгеніне 80 жыл толуына еске алу шарасында бас қосып отырмыз. Әдебиет саласында өзіндік қолтаңбасын қалдырған қаламгер өзінің отты жырларымен қатар, танымдық зерттеулері мен ауқымды мақалалары оқырмандардың жүрегіне жол аша білді, — деген аппарат басшысы Әлсейіт Әлменұлы ағамыздың жұбайы Қолқанат Алиеваға гүл шоқтарын сыйлап, иығына зерделі шапан жапты.
Мұнан соң Журналист, қаламгер, Сарысу ауданының құрметті азаматы Бергентай Нұрмаханұлы, ақын Советкүл Жарылқасынова, желтоқсаншы Нұржан Есмаханов, сондай -ақ, «Сарысу» газетінің ардагерлері мен әріптестері баспасөз саласының ардагерлері, журналист Темірлан Әбілдаев, Күлзағира Жылқыбаева және Шоқан Шөжеев те естеліктерімен бөлісіп, жылы лебіздерін арнады.Сарысу халық театры Әлсейіт Әлменнің «Күн махаббат» атты өлеңін мәнерлеп оқыды. Лэд экранда «Көзден кетседе, сөзден кетпеген» ақынның өмір жолы мен шығармашылығына арналған деректі бейнежазба көрсетілді. «Жарық жүрек, жырымды тыңда» айдарында ақын жырларынан ұсынылған әдеби композиция көпшілікті ерекше әсерге бөледі. Ақынның шәкірті болған жас ақын Бекайдар Аманбаев жүректен шыққан жыр жолдарынан шашу шашты.
Сахна төріне шыққан Әлсейіт ағамыздың жұбайы Қолқанат Алиева мен ұлы Нұрбол Әлменұлы кештің маңыздылығы туралы айтып, ақынын ардақтаған аудан басшылығына ризашылықтарын білдірді. Кеш концерттік бағдарламамен жалғасын тауып, аудандық мәдениет үйінің әншілері рухты әндерді шырқады. Бір бойына түрлі талантты сыйдырған ақынның кеші көпшіліктің есінде көпке дейін қалары анық.
