Бүгін әйел істері және отбасы-демографиялық саясат жөніндегі комиссияның кезекті отырысы өтті. Отырыста қоғам үшін өзекті, әлеуметтік маңызы жоғары бірқатар мәселелер қаралды.
Күн тәртібіне сәйкес, 2025 жылы мемлекеттік отбасылық және гендерлік саясатты іске асыруға бағытталған мемлекеттік әлеуметтік тапсырыстардың орындалу барысы талқыланды. Бұл бағытта жүзеге асырылып жатқан жобалардың тиімділігі, нәтижелері және алдағы кезеңге арналған міндеттер сараланды.
Сондай-ақ, халыққа гендерлік білім беру және ағарту, отбасы институтын нығайту мәселелері бойынша Қазақстан Республикасының заңнамалары аясында ақпараттық-түсіндіру жұмыстарын жүргізу жайы кеңінен сөз болды. Заң нормаларын түсіндіру, отбасы құндылықтарын насихаттау және қоғамдағы жауапкершілікті арттырудың маңызы атап өтілді.
Сонымен қатар, ерекше назар әйелдерге қатысты зорлық-зомбылықты жою халықаралық күрес күніне арналған «Зорлық-зомбылықсыз 16 күн» жыл сайынғы акциясына аударылды.
Акция аясында өткізілетін іс-шаралар, алдын алу тетіктері мен қоғамның белсенді қатысуын қамтамасыз ету жолдары талқыланды.
Комиссия отырысының қорытындысы бойынша тиісті ұсыныстар беріліп, жауапты мекемелерге нақты тапсырмалар жүктелді. Әйелдердің құқықтарын қорғау, отбасы институтын нығайту және гендерлік теңдікті қамтамасыз ету бағытындағы жұмыстар жүйелі түрде жалғасатын болады.
