Мемлекеттік кеңесші Ерлан Қарин әл-Фараби атындағы Қазақ ұлттық университетінің құрылғанына 90 жыл толуына орай өткен салтанатты жиынға қатысты.

Басқосуға іргелі білім ордасының профессорлық-оқытушылық құрамы, студенттері, түлектері және университетпен серіктестік орнатқан шетелдің жоғары оқу орындарының өкілдері қатысты.

Ерлан Қарин жиында Қазақстан Президенті Қасым-Жомарт Тоқаевтың құттықтау хатын оқып берді. Хатта Мемлекет басшысы университеттің мерейлі белесі ұлттық ғылым және тұтас білім беру жүйесі үшін айтулы оқиға екенін атап өткен. ҚазҰУ – еліміздегі алғашқы университеттердің бірі. Халықаралық рейтингтерге сәйкес білім ордасы қазіргі таңда Орталық Азия елдерінің жоғары оқу орындары арасында көш бастап тұр, ал оның түлектері еліміздің өркендеуіне зор үлес қосты.

Мемлекеттік кеңесші өз сөзінде университет ұжымын, студенттерін және түлектерін мерейтоймен құттықтады. Ол әл-Фараби атындағы Қазақ ұлттық университетінің айрықша рөлін, сондай-ақ оның Алматының және білім беру саласының әйгілі брендтерінің бірі екенін атап өтті.

Білім ордасының ректоры Жансейіт Түймебаев өз кезегінде оқу орнының ғылыми-зерттеу бағытындағы, инновация саласындағы жетістіктері, студенттер қалашығының дамуы, университеттің алдағы жоспары туралы баяндап берді.

Салтанатты іс-шарада университет қызметкерлеріне мемлекеттік наградалар табысталды, жас ғалымдарға пәтер кілті берілді, оқу ордасының тарихы мен жетістіктері туралы деректі фильм көрсетілді. Сондай-ақ шығармашылық ұжымдар, қазақ эстрадасы мен операсының әйгілі орындаушылары қатысқан мерекелік концерт өтті.

фото:

https://turkystan.kz/article/253865-l-farabi-atyndagy-kazak-ulttyk-universitetinin-ku-rylganyna-90-zhyl-toluyna-orai-saltanatty-zhiyn-otti