Басқарма басшысы Сержан Назарбек Мойынқұм ауданындағы өңірдегі медициналық ұйымдардың қызметіне зерделеу жасады. Мақсаты – аудан тұрғындарына көрсетілетін медициналық көмектің сапасын арттыру, медициналық ұйымдардың материалдық-техникалық базасын бағалау, өзекті мәселелерді зерделеу және оларды шешу жолдарын айқындау.
Басқарма басшысы ауданның бірқатар денсаулық сақтау нысандарын аралап, медицина қызметкерлерімен кездесті. Медициналық ұйымдардың жұмысына жан-жақты талдау жүргізіп, инфрақұрылымды жаңғырту, кадрлық әлеуетті күшейту және алғашқы медициналық-санитарлық көмектің сапасын жақсарту бағытындағы міндеттерді айқындады.
Атап айтқанда, Бірлік ауылдық дәрігерлік амбулаториясында болып, мекеменің жұмысымен және ұжымның тыныс-тіршілігімен танысты. Мойынқұм аудандық орталық ауруханасының бас дәрігері Бағлан Жүнісбековке нақты тапсырмалар жүктеді. Атап айтқанда, Бірлік ауылдық дәрігерін жалпы практика дәрігері мамандығы бойынша қайта даярлау курсына жіберу, амбулаторияға күрделі жөндеу жүргізу үшін жобалық-сметалық құжаттаманы (ЖСҚ) әзірлеу, сондай-ақ ауыл тұрғындарына көрсетілетін алғашқы медициналық көмектің сапасы мен қолжетімділігін арттыру бағытындағы жұмыстарды күшейту тапсырылды.
