Неге Ерболат Жанәбілов шартты жаза алды, ал оның әйелі нақты мерзімге сотталды: Адвокат мән-жайды айтты
Блогер Ерболат Жанәбілов пен Эльмира Төлегенова сотқа апелляциялық шағым түсірмейтін болды. Бұл туралы Stan.kz ақпарат агенттігі хабарлайды.
Блогерлердің адвокаты Гаухар Айтжанова сот үкімінен кейін апелляцияға шағым берілмейтінін мәлімдеді.
“Мен үшін ең маңыздысы қорғауымдағы адамдардың бостандықта жүргені. Төлегеноваға қатысты бас бостандығынан айыру жазасы бұл прокурордың талабы. Бұл бізге ұсынылған шарттар, біз соған келістік. Апелляция болмайды”, –деді адвокат.
Оның айтуынша, Төлегеноваға берілген жаза кезінде заңбұзушылық болмаса, жаза жеңілдетілуі мүмкін.
“Егер екі жыл ішінде қандай да бір құқықбұзушылық болмаса, сот оны жазадан толық босатуы мүмкін”, – деді Айтжанова.
Сонымен қатар адвокат айыпталушылар жауапкершіліктен жалтармағанын айтты.
“Жауапкершілікті олар әлдеқашан көтерді. Жаза тағайындалды. Ал шартты жаза мен кейінге қалдыру заңда қарастырылған”, – деді ол.
Сонымен қатар процестік келісім Қылмыстық-процестік кодексте нақты көрсетілгенін айтты.
Істің мән-жайы
Еске салайық, 2026 жылғы 13 наурызда Астана қаласының қылмыстық істер жөніндегі ауданаралық сотында блогерлер Ерболат Жанәбілов пен Эльмира Төлегеноваға қатысты іс қарала бастады. Айыпталушылар мен олардың адвокаты сот процесін жабық форматта өткізуді сұрағанымен, сот бұл өтінішті қанағаттандырмады. Алайда сот отырысы кезінде БАҚ өкілдеріне фото және бейнетүсірілім жасауға тыйым салу туралы өтініштері мақұлданды.
27 сәуір күні прокурор Олжас Хайруллаев блогерлерге жаңа жаза мерзімін сұрады. Мемлекеттік айыптаушы Ерболат Жанәбіловке Қылмыстық кодекстің 55-бабын қолданып, түпкілікті жаза ретінде 2 жыл шартты түрде бас бостандығынан айыру және мүлкін тәркілеуді сұрады.
Ал Эльмира Төлегеноваға 2 жыл бас бостандығынан айыру жазасын ең төмен қауіпсіздік деңгейіндегі мекемеде өтеу ұсынылды. Сонымен қатар жазаны өтеу мерзімі 2 жыл кейінге қалдыруды сұрады.
Іс материалдарына сәйкес, айыпталушылар лицензиясыз кәсіпкерлікпен айналысып, аса ірі көлемде табыс тапқан. Сонымен қатар оларға қылмыстық жолмен алынған қаражатты заңдастырды деген айып тағылған.
Кейін судья үкім шығарып, Ерболат Жанәбіловке 2 жылға шартты жаза тағайындалса, Эльмира Төлегенова 2 жылға бас бостандығынан айырылды.
